Get The Perfect Eyebrows

بونسوار صبايا كيف الحال؟

 رمضان خلص بسرعة للاسف الله يتقبل منا و منكم صالح الاعمال و اجا العيد كل سنة و انتم بخير و بفرح و ان شاء الله تكون ايامكم دايما عيد

 نزلت البوست بالوقت الغلط يمكن باجواء العيد بس اول ما تفضوا اكيد رح تقروا الموضوع و تعطوني رايكم فيه و اللي مبين من عنوانه "الحواجب"  اللي بالنسبة الي عبارة عن كريم اساس لملامح الوجه يعني محور الوجه و ملامحه اذا عدلتيها بالطريقة الصحيحة و المناسبة لشكل وجهك و اخترتي لونها المناسب ترسميها و تملئي فراغاتها فيه فيكي تستغني عن كل المنتجات الاخرى لانك ما رح تكوني بحاجة الها و البنت اللي ما بتهتم بجانب الحواجب و تلوينها دايما ما بتلاقي وجهها تعبان او شاحب او ناقصه شيء حتى لو حطت طبقات من المكياج بتضل الحواجب الشيء اللي بيعطيكي اشراقة و الشيء اللي بيلعب دور كبير في تحديد شكل وجهك و ابراز ملفت لملامحه و خصوصا "العيون" و ما بين مية شكل و كل سنة موضة شكل دائما اختاري ما يناسبك و ما يناسب شكل وجهك و اعيد و اكرر اختاري ما يناسبك انسي الموضة لانه اذا رحتي وراء الموضة رح تخربيها على حالك كيف واحدة بتدرس تصميم الازياء و مهتمة بادق تفاصيل الموضة بتحكي هيك؟  بس العقل زينة و مش كل شيء طلع موضة نطبقه علينا و الا رح نوقع بالغلط لانه الموضة بتتغير يعني كل سنة شي جديد مرة بيطلع شيء انيق و مرة شيء مجنون و مشوه حرفيا و الصور توضح "طبعا اقصد بكلامي الموضة بصفة عامة و موضة الحواجب بصفة خاصة بما انه موضوعنا"

1 - طلعت موضة الحواجب النحيفة من عشرات السنين يمكن بالتسعينات و في اللي شالت حواجبها و اعادت رسمها بالقلم و شوفي النتيجة

2 - هالسنوات الاخيرة صار في موضة التاتو اللي انا شخصيا ما بحبها ابدا ابدا و شوفي هالهبلة من قلة الاشكال راحت عاملة حواجب شوز

3 & 4 - و لما طلعت موضة الحواجب العريضة مؤخرا كتير ناس بالغت بعرض حواجبها مثل صورة رقم 3 و اللي عرضت بداية حواجبها و نحفت كتير الوسط و نهايته مثل ما صار بالصورة 4

فموضة الحواجب استمتعي بالقراءة عنها و بمعرفة تفاصيلها فقط لانها اوقات يا هبلة يا حلوة بس مش رح تناسبك و طبعا دايما في اللي يناسبك بتحتاجي فقط للبحث و التجربة الى ان تجديه و تحافظي عليه   

  رح لخص عليكي الموضوع في صور لاني بعرف انه كتير صبايا شكل حواجبها غلط و الشكل الغلط بينعكس على الملامح كلها فبالتالي بيخرب وجهك و بيقلل من جمالك

الوجه المستدير

- رح نبدا مع اول شكل  و اللي هو الوجه المستدير شوفي الفرق  بين صورة اليمين شكل الحاجب دائري على مقوس على نحيف و اللي شكل لنا ازعاج بمجرد النظر الى الوجه و من صورة اليسار اللي هو الشكل الصحيح و المناسب للوجه المستدير خصوصا المليان و اللي خفف من عرض الوجه و قلل من استدارته

 

 

 

 

 

 

 

 

 

 

 

 

 

 

 

 

 

 

 

الوجه المربع 

- الوجه المربع مثل ما شفتي الفرق بين الصورتين واضح و ملحوظ جدا و تاكدتي انه شكل الحاجب المناسب يلعب دور كبير و قوي في ابراز و تحديد ملامحك تماما مثل كونتور للوجه

 

الوجه الطويل 

- الوجه الطويل و خصوصا اذا كان نحيف الشكل المناسب له هو شكل الحاجب المستقيم الافقي بدون تقوسات او انحناءات و يا ريت لو كان الحاجب عريض شوي و خصوصا كمان اذا كان شعرك الطبيعي  "النتيجة روعة" لانه هالشكل بيخفف من طول الوجه و من حجم الجبهة في حالة ما اذا كانت جبهتك عريضة

الوجه القلب 

   

- شكل الحواجب المناسب للوجه القلب مختلف عن ما سبق مثل ما شايفة بالصورة الحاجب لازم يكون دائري نوعا ما بالرغم انه كتير بيكرهوا شكل الحاجب الدائري و لكن صدقيني كتير مناسب لوجه القلب بل الامثل له

الوجه الماسي

-  صاحبة الوجه الماسي بيناسبها اكثر شيء الحواجب عريضة في بدايتها و مقوسة و منحنية باخرها الشيء اللي بيقلل من عرض الوجه و من بروز عظامه

الوجه البيضاوي

- اخيرا الوجه البيضاوي الذي يعد الوجه المثالي اللي بيليق فيه كل شيء و محظوظة من تمتلكه بس دايما في الشيء الافضل و الانسب و الصورة توضح انه المناسب لهالشكل الحواجب ذات الزوايا 

- هلا صار لازم تعرفي كيف رح تحددي بنفسك شكل حواجبك بكل سهولة :   

 نبدا من دمعة العين او الكورنر او احيانا من بداية جانب الانف او حافة الانف حسب شكل الوجه لانه ما لازم تكون الحواجب كتير قريبة من بعضها و اكيد ما لازم تكون كتير بعيدة 

 الوسط و اللي بيكون اتجاه البؤبؤ او بيمر منه

 و بينتهي عند اخر قوس العين
 "ما بعرف اذا شرحي مفهوم او لا بس طبعا اللي عندها اي سؤال و اللي ما فهمت نقطة معينة تسالني" 

: فيكي تستعملي القلم اتجاه حافة الانف و منه رح تعرفي بكل سهولة البداية و الوسط و نهاية حواجبك مثل الصورة التالية  

 

المنتجات اللي رح تستخدميها في رسم وتلوين حواجبك :

: الجل اللي بييجي على شكل ماسكارا دوره بيرتب الحواجب في نوعين منه

 - جل ملون بييجي منه الوان بتختاريه حسب لون شعرك بيرتبلك حواجبك و بيوحد اتجاه الشعر بطريقة حلوة و بيعطيها لون بيبينها طبيعية 

-  جل شفاف شغلته بيرتب الحواجب 

- الوسيلة الثانية او المنتج الثاني : بودرة الحواجب طبعا بتختاريها حسب لون شعرك او اغمق منه بدرجة واحدة 

- فيكي كمان تستخدمي الاي شادو بشرط انه يكون مات اي مطفي 

 

- و في كمان الاقلام اللي انا شخصيا ما بحبها خصوصا الاقلام الجافة لانها بتعطي لوك حاد و شرير و مصطنع بينما البودرة لما بستعملها بيطلع شيء كتير طبيعي و مرتب و ناعم 

- و الجل الكريمي اللي ممكن تستخدميه في تحديد شكل حواجبك و بعدين بتجيبي البودرة و بتملئي الفراغات و بتلونيها لحتى يكون شكلها مرتب و متناسق 

- ما رح ننسى اكيد التويزر اي ملقط الحواجب لتشيلي فيها الزوائد فقط و المقص في حالة ما اذا كانت شعيرات حواجبك كتير طويلة 

- و اكيد اكيد الوسيلة الاهم "فرشة الحواجب الاساسية اللي اسمها Angled" اللي دورها كتير كبير في تحديد حواجبك شكلها مثل الصورة في اللي بييجي حجمها اكبر و في الاصغر اللي انا شخصيا بفضلها ليش لانها دقيقة و بتسهل عليكي موضوع تحديد الحواجب بدون ما تخبص الامور اللي بالصورة من سيجما و  رقمها E75 

رح فرجيكي كام صورة عن خطوات تحديد الحواجب و ترتيبها و تلوينها : 

- مثل ما شفتي اول شيء قامت به صاحبة الصورة مشطت حواجبها و رتبتها ثم حددت شكل حواجبها المناسب من الاسفل و من الاعلى ثم قامت بتلوينها و ملئ فراغاتها بعد ما اختارت اللون المناسب و اهم شيء بنصحك فيه اختاري دايما لون اغمق من شعرك بدرجة او اثنين و حاولي ما تغمقي بداية حواجبك مشان هيك دايما و غالبا بينزلوا لونين باي باليت او كيت للحواجب واحدة افتح و الثانية اغمق  

- نفس الشيء عملته صاحبة الصورة الثانية اضافت فقط الهايلايت او اضاءة تحت الحواجب لابرازها اكثر ممكن كمان تستعملي الكونسيلر حوالين الحواجب لتنظفيها و تبين بشكل اكثر وضوح و تبرز اكثر 

اتبعي هالطرق بدون خوف و اتمرني كتير و انا اكيدة رح تضبط معك :)

رح فرجيكي صور اشكال الحواجب اللي انا شخصيا بعشقها و اللي اغلبها طبيعية او تقريبا طبيعية :

و صور اخرى عبارة عن قبل و بعد لتشوفي الفرق و تعرفي اهمية الحواجب المرتبة و مثل ما شايفة بالصور نفس الشخص نفس العيون نفس المكياج بس "قبل" بينت العيون باهتة و ذبلانة بينما "بعد" بينت الملامح اكثر و صار في اشراقة و العيون برزت اكثر :

- رح نحكي كمان عن الاخطاء الشائعة بعالم الحواجب و اللي انتبهت على كتير ناس في محيطي متجهين و متبعين نفس الغلط للاسف رح اعطي بعض الامثلة : 

التاتو : طبعا التاتو مش غلط بس انا شخصيا بحسه مزيف و مصطنع و بيعطي لوك حاد و شرس مضبوط في تغيير كبير بالصور بين قبل و بعد بس كمان ما في روح ما في شيء طبيعي و معبر و ما حسيت بجمال زيادة عن ذلك بتصيري تشبهي غيرك لان كله صار ضارب هالتاتو فبحب انك تكوني مميزة عن غيرك طالما الكل صار عبارة عن تاتو بس في ناس مجبرة ما بيطلع لها شعر اي ما بينمو بهالمنطقة في حالة ما اذا كنت من هالناس اعمليه بالطريقة الصحيحة لا تعمليلي مثل هدول 

- اختيار اللون الغلط : هذا تقريبا من الاخطاء الشائعة اللي كتير بيرتكبوها و ماشيين و مستمرين عليها بحيث بتلاقي اللي شعرها اسود صابغة حواجبها اشقر و اللي بلوند حواجبها شديدة السواد و اللي حواجبها شقراء زيادة عن اللزوم مثل الصور التالية :

- مثل ما شفتي اخطاء فادحة لذلك بنصحك اول شيء :

 - بالابتعاد عن الاسود القاتم مهما كان شعرك غامق سواء

بني شوكولا او اسود و اختاري بداله البني الكتير الغامق 
- البني المحمر و البني الاشقر : اختاري البني الوسط الى الداكن 
- الاشقر البلاتيني : اختاري الاشقر الغامق او البني الفاتح جدا و تجنبي صبغ حواجبك بلاتيني كمان مثل ما صار باخر 3 صور
- الاحمر : البني الدافئ

ما تنسي ملاحظتي السابقة انه ما لازم تستعملي لون واحد لحواجبك كلها و انما لازم يكون في دايما معك درجة افتح لبداية حواجبك 

 ان شاء الله اكون افدتك و لو شوي و بتمنى تكوني حبيتي البوست و لقيتي فيه حل لمشكلتك اذا في اي شيء ناقص و نسيت احكي فيه اتركي لي تعليقك و ان شاء الله بعمل بوست اخر كجزء ثاني 

طبعا اذا في اي موضوع حابين اكتب عنه اكيد خبروني على طول

 و شكرا على متابعتكم و تشجيعكم الدائم الي شكرا كمان لزميلاتي اللي اكدولي انه مش بس بيهمهم نجاحهم بل بيتمنوا الخير للجميع و مساعديني كتير سواء بمتابعتهم الي او بنشرهم لمواضيعي او بكلامهم المشجع شكرا لكل الصبايا اللي بيدعموني و بيحبوني في الله و بدون اي مقابل انتوا اللي بتخلوني استمر و بتحسسوني اني عم قدم شيء حلو فشكرا كتير للكل 

و دمتن في رعاية الله  :)