Your Skin Care Guide | دليل العناية ببشرتك

بونسوار صبايا كيف الحال؟

 اليوم رح نحكي عن موضوع مهم و انطلب مني كتير من الناس اللي بتثق بمواضيعي و برايي و هو كيفية العناية بالبشرة

 اول شيء بدي اذكرك بكم نقط مهمة لازم تعرفيها قبل ما نفوت صوب الموضوع 

العناية لا تقتصر فقط على الكريمات و المنظفات و الماسكات اذا كان فهمك هاي هي العناية الصحيحة بالبشرة بحب اقلك انه فهمك غلط و لازم  تصححيه اول شيء لازم تلتزمي بنظام غذاءي صحي و تاكلي الماكولات الغنية بالفيتامينات مثل السمك - الخضار - الفواكه - العصاير 

و تشربي طبعا ماء من 5 الى 8 اكواب يوميا ممكن تخافي من الرقم و تقولي طيب كيف رح الحق اشرب 8 اكواب عادي جدا اول ما تصحي اشربي كوبين و خذي معك دايما قارورة ماء متوسطة الحجم على دوامك او شغلك و بدون ما تحسي حتلاقي نفسك خلصتيها و هيك بتكوني شربتي كوبين ثلاثة بدون ما تشعري نفس الشيء اذا كنتي بتمارسي الرياضة كل 15 دقيقة اشربي شوي الى ان تخلصيها بترجعي عالبيت بتشربي بعد الغذاء بنص ساعة سادس كوب ساعة العصر اشربي سابع كوب و ساعة المغرب اشربي ثامن كوب

 ملاحظة :  حاولي بعد الساعة 8 ما تشربي شيء و الا حيصير معك اضطراب بالنوم + انتفاخ تحت العين


   

  "النوم يحسن من جمالك"

  جملة اعجبتني قريتها بتويتر و فعلا صحيحة مئة في المئة - لازم تنامي 8 ساعات متواصلة يوميا طبعا مش قصدي النوم اللي بيكون من الساعة 1 الى 9 صباحا 

و انما اقصد النوم الصحي اللي فيه بترتاح البشرة و بتتجدد فيه الخلايا و اللي بيكون من الساعة 10 الى 6 او 7 صباحا 

طبعا اذا التزمتي بهالثلاث نقاط : النوم الكافي - الاكثار من شرب الماء و العصاير - اكل صحي غني بضمن لك الحصول على بشرة نضرة سليمة متوازنة اما اذا  تجاهلتيها بحب اقلك الف و اغلى كريم ما حيفيدك كوني على يقين 

ثاني شيء مهم لازم تعرفيه انه العناية بالبشرة المفروض تبدا من عمر 18 يعني اقصد العناية الخفيفة تنظيف
 و ترطيب و استعمال الواقي 

اما التجاعيد بتتكون من عمر 21 و 22 و بيبدا ظهورها من عمر 28 بمعنى غلط انك تفكري انه بس تصيري بال 28 او الثلاثينات تبلشي تهتمي ببشرتك او مثل ما بعض النساء بيفكروا اول ما تطلعلي التجاعيد بصير استخدم الكريمات و بعتني بنفسي فكرة غلط غلط غلط اللي عم نعمله احنا مش عمليات تجميل ربع ساعة و بتحصلي على النتيجة الحلوة لا العناية بدها وقت و استمرار و عدم الكسل و كل ما عمرك يكبر كل ما حتلاحظي فرق واضح ببشرتك و كل ما اعتنيتي ببشرتك من على بكير كل ما بتحميها و بتحمي حالك من كتير قصص ممكن تصيبها من على بكير كمان  

طبعا مو معنى كلامي اذا كنتي اكبر خلاص راحت عليكي لا بلشي من اليوم و استمري صحيح النتائج حتتاخر لانك اتاخرتي و لكن موجودة و رح تلاحظيها ان شاء الله مع المداومة

عدم المبالغة - لا افراط ولا تفريط

نقطة مهمة لبعض البنات مو معنى اني قلت العناية بالبشرة لازم تبدا من عمر 18 تبالغي بهالشيء 

انتي بهالعمر لا تحتاجين الى سيرومات و كريمات بتقلل من التجاعيد شو في بينك و بين التجاعيد اساسا؟  

و العكس لا تحكي انا صغيرة لسه خلاص عادي اقل شيء لازم يكون واقي الشمس معك و بتستعمليه كل صباح 

نقطة اخيرة لازم تختاري مش بس المنتجات اللي تناسب طبيعة و نوع بشرتك بل حتى اللي تناسب عمرك كتير ناس لا تنتبه لهالنقطة فمثل ما حكيت المراهقات لا يحتجن لهالضجة و مليون منتج و سيروم و ماسك و عناية فظيعة و اللي باول العشرينات اي من 21 الى 25  بيحتاجوا لفيتامينات غير اللي تحتاجها بنت اواخر العشرينات و اول الثلاثينات و هكذا يعني لكل عمر اله عنايته و كل بشرة الها فيتامينات و مواد تحتاجها حسب سنها

 : و لحتى تعرفي شو المنتجات اللي بتناسبك لازم اول شيء تعرفي طبيعة بشرتك و اللي تنقسم الى خمسة 

 جافة = Dry

 حساسة = Sensitive

 عادية = Normal

 مركبة / مختلطة  = Combination

 دهنية = Oily 

اول صورة من اليمين بتعبر عن البشرة الدهنية اللي بتفرز دهون بزيادة بكل مناطق الوجه اضافة الي مسام هالبشرة بتكون واسعة  + هالبشرة بتتميز كمان بظهور الحبوب و الرؤوس السوداء 

نسبة لحرف التي و شكله   T-Zone  المختلطة او المركبة  بتفرز دهون بس من منطقة الجبهة و الانف و الذقن لذلك سميت بال

  بينما الخدود يا بتكون عادية يا جافة و المسام بتكون واسعة كذلك و تتميز كمان بالرؤوس السوداء

البشرة العادية تعتبر من احلى البشرات و التعامل معها جد سهل بما انها بشرة متوازنة لا دهنية و لا جافة 

البشرة الجافة تتميز بشحوب اللون و ظهور بقع جافة بالخدود و تقشر بعض المناطق بالوجه نتيجة كثرة الجفاف + الجلد بيكون رقيق + المسام صغيرة جدا 

البشرة الحساسة تتميز بالاحمرار و تهيج البشرة و تاثرها بسرعة بعد اي حركة بسيطة و بعد استعمال اي منتج الا اذا كان طبي خالي من العطور و اللون و الكحول  و ممكن تنتمي الى الاربع انواع اللي فوق يعني ممكن تكون بشرتك جافة و حساسة بنفس الوقت او مختلطة و حساسة و هكذا 

اطلعي على حالك بالمراية و حاولي تعرفي نوع بشرتك بعد ما تنظفيها و تغسليها بالماء البارد انطلاقا من المعلومات اللي فوق 


كمان بعد ما تغسلي وجهك ما تمسحيه بالفوطة بالعكس خليه ينشف لحاله اذا نشف بسرعة معناته بشرتك جافة ليش لانه بسرعة امتصت الماء اي كانت بحاجة بس لشيء تشربه و يرطبها اذا لاحظتي العكس افراز دهون بزيادة في الوجه الكامل و المسام وسعت اكثر بطريقة ملحوظة معناته بشرتك دهنية اذا لاحظتي هالشيء بس بمنطقة الذقن و الانف  و الجبهة اي التي زون معناته مختلطة و هكذا يعني هالحركة اعمليها بس اذا لقيتي صعوبة في معرفة نوع بشرتك 

رح نبدا بالاشياء اللي تحتاجها كل البشرات و مناسبة لجميع الاعمار و هي بالترتيب 


المنظف - المقشر - التونر او قابض المسام - المرطب - واقي الشمس 





التنظيف

خطوة اساسية جدا للجميع و لا يمكن الاستغناء عنها لانها عماد العناية بالبشرة بحيث ما فيكي تستفيدي من ولا اي منتج و ما فيكي تستعملي ولا اي كريم او خلطة الا على بشرة نظيفة 



استعماله و كيف تختاري المنظف المناسب لك 


لازم تستعمليه مرتين باليوم مرة صباحا و مرة ليلا حتى و ان كنتي ما بتسعملي المكياج ضروري تحافظي على نظافة بشرتك 

طريقته سهلة و عادية بس بتغسلي وجهك و بتحطي شوي منه على وجهك و بتدلكي بطريقة ناعمة وجهك كله بدون ما تنسي الرقبة اخيرا بتشطفيه 

اذا كانت بشرتك عادية او جافة : اختاري المنظف اللي قوامه حليب او كريمي  لحتى يرطب لك بشرتك بنفس الوقت 

اما اذا كانت بشرتك مختلطة او دهنية : اختاري المنظف اللي قوامه جل خفيف ليش لانه الجل بيمتص دهون البشرة الزايدة و بيحاول يوازنها

 البشرة الحساسة : اختاريلها منظفات لطيفة و جنتل على البشرة سواء كانت جافة حساسة او دهنية حساسة و ابتعدي عن المنتجات الصناعية و استعملي المنتجات الطبية اضمن و الطف على بشرتك بحيث بتكون خالية من العطور و الكحول و اللون و هذا بالضبط ما يناسب هالبشرة 










التقشير 

كمان تعتبر خطوة جد مهمة لانها بتخلص البشرة من الاوساخ و الجلد الميت 
و طبعا كثرة استعماله قد تؤدي الى نتائج عكسية يعني و ان كانت بعض المنتجات بتكتب بوجه المنتج "للتقشير اليومي" ما تروحي ورا هالكلام 


اذا كانت بشرتك جافة / عادية : مرة بالاسبوع
اذا كانت بشرتك مختلطة / دهنية : مرتين بالاسبوع 
البشرة الحساسة : نفس الشيء اذا كانت دهنية او مختلطة مرتين بالاسبوع اذا عادية او جافة مرة واحدة فقط كافية جدا

ليش لانه المقشرات تنظيفها عميق و بتشيل الاوساخ و الخلايا الميتة و كل شيء مخزون جوا فاذا عملنا هالحركة يوميا بنكون عم نقضي على بشرتنا لدرجة ممكن تجف و تطلعلك قشور فالحل انك تعطيها وقت تتنفس و ترجع تكون حالها من جديد لحتى تقدري تنظفيها مرة اخرى 

المقشرات عموما لكل البشرات بس لازم تراعي اذا بشرتك جافة او حساسة تختاري مقشرات حبيباتها صغيرة لحتى تكون انعم على بشرتك

الطريقة جد سهلة بتعملي تدليك باصابعك لوجهك كله و لازم تكوني لطيفة مع بشرتك مو تدعكي بقوة و تحرقي بشرتك لا شوي شوي بتشطفيه و اخيرا بتمسحي وجهك بطريقة ناعمة جدا و خلي بشرتك ترتاح و تجهز حالها للخطوة الثالثة 






التونر =  قابض المسام

من اسمه مبين دوره بيقبض المسام - بينظف الوجه من بقايا المكياج - بيشد الوجه في منه نوعين نوع لا يحتوي على الكحول "للبشرات العادية و الجافة و الحساسة" و نوع يحتوي على الكحول للبشرات المختلطة و الدهنية  

  و ممكن تستبدليه بمكعب الثلج او ماء الورد 
في ما يخص ماء الورد اشتري اللي بيكون داخل زجاجة مو علبة العلبة يعني بلاستيك و من البلاستيك لوجهك مباشرة يعني ضرر ضرر ضرر 
و لنتائج احسن احفظيه داخل ثلاجة و خليه يبرد قبل ما تستعمليه 


استعماله سهل كمان بتبللي القطنة بماء الورد او التونر حسب اختيارك و بتمسحي بشرتك بهالقطنة و بتخليه ينشف 

كنقطة مهمة بالنسبة للبشرات الجافة و الحساسة انصحها بالمياه المعدنية اللي ممكن تستخدميها كتونر بذات الوقت بترطب البشرة 
ليش لانه التونرز عموما بتنشف البشرة كتير فممكن هالشيء يضايق بعض البشرات 




الترطيب 

اول شيء حابة اذكرك اوعك تحطي المرطب مباشرة بعد التونر في كتير ناس بتعمل هالشيء و هذا اكبر غلط
لازم تستني التونر يجف بعدين بس بتقدري توزعي من المرطب 
و طبعا الخطا الثاني اللي يعتبر اجرام بالنسبة الي انك تحطي التونر و تطنشي اخر خطوة شو ذكرنا من شوي التونر بيجفف البشرة اذن لازم تستعملي المرطب 
كوسيلة تعيد لبشرتك توازنها 

و الخطا الثالث هو فكر بعض الناس انه اللي بشرتهم دهنية لا يجب عليهم ان يقوموا بهذه الخطوة و طبعا هذا اعتقاد خاطئ الترطيب لازم و ضروري لكل البشرات
 فقط عليكي حسن اختيار المنتج المناسب 

الطريقة لا تحتاج الى شرح بتحطي شوي باعلى اصابعك و بتوزعي هالكمية البسيطة على كامل وجهك و رقبتك 

اذا كانت بشرتك عادية / جافة : اختاري المرطبات اللي قوامها كريم

اذا كانت بشرتك مختلطة / دهنية : اختاري المرطبات اللي قوامها جل 

اذا كانت بشرتك حساسة : نفس الكلام رح ارجع اعيده اختاري المرطبات الخالية من الكحول و العطور





واقي الشمس 

اخيرا بتوزعي من واقي الشمس قبل ما تطلعي بربع ساعة يعني مو تحطيه و تطلعي لا استني مرور 15 دقيقة بعدين اطلعي و انتي مطمئنة على بشرتك
 SPF اذا كانت بشرتك من النوع اللي بتتاثر بسرعة  او بيضاء جدا او فاتحة عموما اختاري الواقيات اللي "رقم" عامل الحماية تبعها عالي او ما يصطلح عليه ال
مثل 30 او 40 او 50 اما اذا ما رح تتعرضي للشمس كتير ف 20 كافية 



للبشرات الدهنية / المختلطة : اختاري كمان الواقيات اللي قوامها جل خفيف الاقرب الى الماء 
للبشرات العادية : اختاري الواقيات اللي قوامها لوشن 
للبشرات الجافة : اختاري الواقيات اللي قوامها كريم


كالعادة لا تنسي توزعي منه على رقبتك  و كتذكير لازم تستعمليه دائما سواء في الصيف او الشتاء لانه كتير ناس مفكرة انه واقي الشمس ما اله لزوم بفصلي الخريف و الشتاء بينما العكس شمس و الاشعة اللي احنا بنشوفها خفيفة بفصل الشتاء اخطر ميت مرة من شمس الصيف 






من الاشياء الاخرى اللي لازم تكون متوفرة عند كل صبية شو ما كان عمرها 







كريم العيون 

 من المهم جدا انك تحرصي على العناية بمنطقة حول العينين بما انها محور الملامح و محور الوجه كله 
و العناية فيها ما الها علاقة بالعمر ممكن بنت في سن المراهقة تعاني من جفاف بمنطقة حول العينين او انتفاخ او هالات 
اختاري الكريم حسب المشكل اللي تعانين منه و استعمليه بعد ما ينشف التونر و قبل المرطب مش بعد 

مثلا اذا تعانين من انتفاخ في عندك هالسيروم معالج لهالمشكلة من كلينيك  

و اذا بتعاني من الهالات الغامقة في عندك هالكريم  من شيسيدو و هكذا 





استعمالها

مثل ما سبق و ذكرت تستعمل بعد التونر ما ينشف و قبل المرطب تبعك 
احسن وقت تستعملي فيه هالكريمات قبل النوم بما انه قوامها بيكون ثقيل ثاني شيء البشرة عموما بتستجيب لهالعلاجات بالليل 
انما اذا كان قوامها خفيف جدا ممكن تستعمليها مرتين باليوم صباحا و قبل النوم 














مزيلات المكياج

سبق و ذكرنا انه ما فينا نستفيد من و لا اي تريتمنت او خلطة او كريم الا على بشرة نظيفة 
و اكبر جريمة ممكن ترتكبيها في حق بشرتك تنامي بالمكياج يعني عندي تشيلي مكياجك كل يوم قبل ما تنامي بدون ما تلتزمي بباقي الخطوات احسن مليون مرة من انك تاجلي هالخطوة 
للصبح لانك لو تنظفي و تقشري و ترطبي و تعملي كل هالخطوات الصبح ما حتستفيدي بكل صراحة فاللي بتمارس هالعادة
 تغيرها من الان ضروري ضروري تشيلي مكياجك قبل ما تنامي 
تجنبي المزيلات الحليبية او الكريمية لانها ما بتشيل المكياج الا بعد مشقة و اختاري بدالها مزيلات زيتية او مائية بما انها بتشيل المكياج بطريقة عميقة و سريعة مثل بيوديرما - غارنييه - نيفيا و غيرها 

كريم لعلاج حب الشباب و الحبوب عامة 

مش كل الناس محظوظة و عندها بشرة نضرة خالية من الحبوب و بعض المشاكل الجلدية
 مثل الاكزيما - حب الشباب و غيرها من المشاكل 
طبعا هالموضوع ما فيني احكي عنه بهالبوست لانه طويل و اسبابه عديدة تختلف من بنت للثانية  
لكن في مرهم جدا حلو شخصيا جربته و فادني و بحسه لازم يكون عند كل صبية و هو مرهم لاروش بوزيه

مناسب لكل انواع الحبوب سواء حب الشباب او حبوب الصغيرة اللي بتطلع نتيجة العرق او الحبوب اللي بتطلع بالخدود بسبب الكريمات الثقيلة زيادة عن اللزوم او الحبوب اللي بتطلع عند اقتراب موعد الدورة فانا بشوفه شخصيا منتج بطل و لازم يكون عندك 





استعماله

بالليل بعد كريم العيون و قبل المرطب 








طبعا اي بنت لا تعاني من هذه المشاكل يمكنها الاستغناء عن المرهم و كريمات العيون ما في لزوم تستعملها



بمعنى روتينها الصباحي لازم يضم : منظف - مقشر - تونر - مرطب - واقي الشمس 
و روتينها الليلي : مزيل المكياج - منظف - تونر - مرطب 





و العكس الناس اللي عندها هالمشاكل حيصير روتينها هيك 




الصباح : منظف - مقشر - تونر - كريم العيون اذا كان خفيف - مرطب - واقي الشمس 
الليل : مزيل المكياج - منظف - تونر - كريم العيون - تريتمنت لعلاج الحبوب - مرطب 
الان رح نحكي عن العناية اللي تحتاجها البشرات اللي بمنتصف و اواخر العشرينات و الثلاثينية  







طبعا كل اللي ذكرناه فوق بيهم جميع البشرات اي ما رح تضطري تتخلي عن خطوة من اللي ذكرناها 
سابقا رح تطبقيها و تمشي عليها 

 و رح تضيفي كم شغلة تحتاجها بشرتك بهالعمراكثر مثل كريمات العيون / سيروم / كريم ليلي للتخفيف من التجاعيد اللي ذكرنا انها بتتكون من عمر ال 21 و تبدا بالظهور من عمر ال 28 فهذا هو السن المناسب لبدء استعمال هالنوع من الكريمات 

بالنسبة للبشرة العشرينية : اختاري السيرومات و الكريمات الليلية اللي تحتوي على هالمواد 
Vitamin a & c - Retin a - Tazorac - Avage 
بعدين رح احكي بالتفصيل عن هالمواد في المواضيع الجاية 

 لحتى اسهل عليكي الموضوع  اخترت لك 4 منتجات بالصورة ليوصلك قصدي و تفهمي علي اكثر ممكن هي نفسها تدوري عليها ببلدك و تستعمليها و ممكن تدوري على شيء ثاني من ضمن مكوناته المواد المذكورة 

البشرة الثلاثينية : اختاري السيرومات و الكريمات الليلية اللي تحتوي على هالمواد
Retinol - Vitamin c 

اخترت لك كمان 3 منتجات كامثلة و ممكن تختاريها هي نفسها
اولاي - استي لودر - ميوراد 

اما فيما يخص كريمات العيون عندك مثلا من كلينيك  
هالعلاج اللي يعتبر ليلي لمنطقة ما حول العينين للتخفيف من التجاعيد 
بتناسب اللي اعمارهم بين 26 و 35 يعني حلو للبشرات اللي بمنتصف و اواخر العشرينات و الثلاثينات 



استعمالها بالترتيب 


بعد ما ينشف التونر مثل ما ذكرنا حطي كريم العيون
بعد كريم العيون وزعي من السيروم الخاص فيكي قطرتين فقط على وجهك و رقبتك 
و اول ما ينشف هالسيروم و يتغلعل جوا بشرتك حطي الكريم الليلي اللي يحتوي على المواد المذكورة حسب عمرك على بشرتك و رقبتك 

اذا حيصير روتينك هيك 

بالصباح : منظف - مقشر - تونر - كريم العيون - مرطب - واقي الشمس 
بالليل : مزيل المكياج - منظف - تونر - كريم العيون - تريتمنت معالج للحبوب اذا بتعاني من هالمشكل اذا لا بعد كريم العيون - سيروم - مرطب / كريم ليلي 








كيف تعرفي انه هالمنتج من ضمن مكوناته المواد المذكورة 


عادي جدا خذي المنتج و اقرئي بنفسك مكوناته يعني تعلمي تعملي هالشيء ما تشتري و خلاص لا خذي وقتك الكامل قبل لا تشتري اي منتج و شوفي المكونات و ركزي و دققي على كل النقاط و ما تسمعي لكلام بعض التاجرات او الموظفات لانه اوقات مش كل اللي بيشتغل بمجال معين بيفهم فيه فدايما اتكلي على نفسك 
سجلي هالمكونات اللي رح احكي عنها بعدين ببوست خاص بورقة و خذيها معك و انتي رايحة تعملي شوبينج لتتذكريها 

اخيرا بالنسبة للماسكات او الاقنعة "الطبيعية" ما نسيتها اكيد بس افضل احكي عنها ببوست خاص 
اذا حابين الفكرة خبروني بالتعليقات 







ملاحظات 



لازم تداومي على هالروتين مع مراعاة اول ثلاث نصائح اللي ذكرتها ببداية الموضوع


لا تلمسي وجهك كل شوي لانها مش دايما بتكون نظيفة يعني الواحد بيروح الدوام و بيلمس اوراق و بيركب السيارة و بيلمس اشياء كلها بكتيريا بدون ما يحس
فما بيصير تلمسي وجهك بكثرة و بدون سبب 


 اذا كنتي جديدة و ما بحياتك اعتنيتي ببشرتك من قبل و لاحظتي ظهور بثور و بقع و حبوب 
فور بدئك بعملية العناية هذا الشيء عادي جدا 

ليش لانه صارلها وقت طويل مخباية و مخزونة جوا الجلد  فلما بدئتي بعملية التنظيف و التقشير 
و العناية بصفة عامة بلشت هالعيوب تظهر و تطلع

فما تخافي و تبطلي روتينك و ترجعيها مكان ما كانت بالعكس استمري و طلعي كل العيوب اللي مخزونة جوا الى ان تعالجيها و تختفي تماما 

هذا كان كل شيء بالنسبة لهالموضوع بتمنى تكونوا استمتعتوا فيه و حبيتوه بتمنى ما اكون نسيت شيء

 و طبعا اللي عندها اي اضافة او نقطة مهمة تذكرنا و تشاركنا فيها لنستفيد كلنا

  بالنسبة لمتابعاتي المخلصات بشكركم من قلبي انتوا اللي بتخلوني استمر و احس اني عم اقدم شيء حلو 

و شكرا لزميلاتي اللي بيدعموني و بيشجعوني بكلامهم و تعليقاتهم و نشر مواضيعي لتوصل 

❤️ شكرا من القلب ❤️ 

Ask | Twitter | Email    :  للتواصل و الاستفسار عن اي شيء 

                                

 :) و دمتن في رعاية الله