Make-up For Beginners | مكياج للمبتدئات

بونسوار صبايا كيف الحال؟

اليوم موضوعي موجه للمبتدئات بعالم المكياج هالموضوع انطلب مني كتير بالفترات الماضية فقررت اكتب عنه اخيرا لاني شفت حماس بكتير بنات و حسيت قد ايش حابين يعرفوا كل شي بخصوص المكياج و قد ايش صار بدهم يهتموا بنفسهم و يعتنوا بجمالهم فاقل شيء اقدمه لهم هو هالموضوع اللي رح احكي فيه عن كل شيء بيخص المكياج مع الصور و التعريف بكل منتج لشو بنحتاجه و طريقة استعماله و رح حاول رشحلكم كم منتج حلو من الدرجستور ليش من الدرجستور؟ 

لانه اسعارها حلوة و بسيطة و تنفع لك كمبتدئة و فيكي تاخذي كتير الوان و درجات مع الوقت و تجربي من هون و من هون و بنفس الوقت جودتها عالية - حطي ببالك انه مش كل شيء غالي حلو و مش كل شغلة سعرها بسيط بشعة 

يعني ما لازم نكون سطحيين و نظلم ماركات و منتجات ممكن تكون احسن من كذا منتج من الهاي اند 

فاهم شي عندنا هلا مش مكياجنا من وين و كام سعره لا بدنا مكياجنا جودته تكون عالية و نتعلم شوي شوي طريقة توزيعه لحتى يطلع انيق و مرتب و اهم شيء نختار المنتجات الصحيحة و المناسبة لنا لانه 3 شغلات بتكمل بعضها بعالم المكياج - الايد و جودة المنتجات و اختيار المنتجات المناسبة - بمعني اذا في عندك منتجات جودتها عالية "غالية او مش غالية" و طريقة توزيعها غلط و مختارة اشياء غلط ما الها علاقة بطبيعة بشرتك او لونك ما في اي جمال ولا اناقة ولا حدا اصلا حيكون مهتم يعرف كمية المنتجات الغالية اللي حاطتيها بوجهك بس اذا اخترتي المنتج المناسب لطبيعة بشرتك و لونك من ماركة جودتها حلوة و سعرها بسيط و صرتي تشوفي فيديوهات و تطبقي اللي شفتيه على وجهك و على وجوه اخواتك الى ان تتعودي و تصيري تمام كل شي حيطلع بيرفيكت و محترف و هيدا اللي بدنا نوصله من خلال هالموضوع اللي حيتضمن اسماء المنتجات و كيف نوزعها و مين بتحتاجها و المناسب لكل بشرة و انتم عليكم تفوتوا عاليوتيوب و تتفرجوا على كام مقطع و تطبقوه عليكم

الموضوع حيكون طويل لهذا قسمته ل 3 اجزاء و هذا الجزء كل شيء رح احكي عنه فيه حيكون عن مكياج الوجه و الاجزاء الاخرى رح تتضمن كل شيء بيخص مكياج الوجه و الشفاه

تذكير :

بشرتك اذا ما كانت نظيفة و مترطبة صدقيني صدقيني صدقيني ما رح تحصلي على مكياج مرتب و انيق فدايما اذا بدك مكياجك يكون حلو اهتمي ببشرتك و خليها دايما نظيفة و اهتمي بمنطقة العيون لانه المكياج مجرد اضافة حلوة و السر كله موجود بالبشرة اذا حافظتي و اعتنيتي فيها النتائج دايما حتكون روعة اذا لا مهما المكياج كان غالي و مهما كنتي محترفة ما رح يطلع حلو مثل ما بدك فبرجع قلك حافظي على بشرتك و اعتني فيها و قبل المكياج دايما حطي المرطب الخاص فيكي

نرجع لموضوعنا و نبدا و بسم الله 

طبعا في ناس كتير مفكرة انه اول منتج بنحطه على وجهنا هو الفاونديشن = كريم الاساس 

لا لا لا دايما بنبدا بشيء اسمه برايمر اللي يعتبر قاعدة بتنحط قبل الاساس و هو انواع بتختاريه حسب طبيعة بشرتك و احتياجها
الشيء الوحيد المشترك بين كل هالبرايمرز من مختلف الانواع هو انه بيساعد على بقاء المكياج لفترة طويلة و بيثبته لساعات

في نوع للبشرات الدهنية و المختلطة وظيفتها تمتص دهون البشرة و تخفف من لمعانها و بتصغر من حجم المسامات الواسعة و بتخفف منها 
مثل ما شايفين بالصورة في عندنا من ميبيلين بيبي سكين - ريميل ستاي مات - لوريال ستوديو سيكرت "مناسب للبشرات العادية و الجافة كمان"

و نوع للبشرات العادية / الجافة وظيفتها ترطب البشرة لحتى تسهل عملية توزيع الاساس بدون ما يطلعلك قشور  

في عندنا بالصورة برايمر من الف جدا حلو و لوريال تقريبا مناسب لجميع البشرات بنصح فيه كتير لانه اكثر من رائع 

و نوع ثالث و اللي ما كتير بينحكى عنه مع انه اكثر من مهم و اللي وظيفته يصحح لون البشرات الذبلانة الباهتة و يوحد لونها مثل ريفلون فوتوريدي "اللي لونه بينك" كمان تركيبته بتساعد على تخفيف الاحمرار و في برايمرز بتخفي او بتقلل من الاحمرار اللي بالبشرة بشكل محترف و بترجعها للونها الاصلي بدون عيوب و احمرار و بتخليها جاهزة تستقبل باقي المنتجات مثل برايمر لوريال اللي لونه اخضر "ما تخافي من لونه الاخضر عادي جدا" في الوان اخرى البنفسجي الاصفر بتستعمليها حسب المشكلة اللي بتعاني منها
 و في نوع يستخدم قبل التصوير و عندنا ريفلون فوتوريدي "اللي لونه ابيض" 

طريقة توزيعه : 

بتوزيعه بطريقة عادية باستعمال اصابعك فقط ما يحتاج لفرش

ملاحظة : 

مش ضروري تستعمليه فقط قبل المكياج لا فيكي تحطيه لحاله حسب احتياج بشرتك و تطلعي عادي 








الفاونديشن = كريم الاساس 


طبعا تختلف انواعه حسب طبيعة بشرتك و حسب التغطية اللي انتي حاببتيها في فاونديشنز تغطيتها خفيفة و في اللي تغطيتها متوسطة و اخيرا في اللي تغطيتها عالية فانتي اللي بتحددي هذا الشيء حسب رغبتك 

ما رح احكي بشكل مفصل عن انواعه لانه هالموضوع بالذات لازم ينحكى عنه لحاله ببوست واحد بطريقة مفصلة 

و لكن ممكن اقربك شوي من بعض المفاهيم و اعرفك على كام نوع و شو الانسب لك

 الاساس الليكويد و الكريم = تغطيتها متوسطة الى عالية = مناسب للبشرات العادية و الجافة 

الاثنين اللي بالصورة من ريفلون بنصح فيها كتير جد رائعة 

المرطبات الملونة = تغطيتها خفيفة = مناسبة للبشرات اللي ما فيها كتير عيوب

بما انه تغطيتها خفيفة فما تتوقعي انها تغطيلك كافة عيوبك فلهذا بقلك مناسبة لك فقط اذا بشرتك ما فيها هالقد عيوب 

من اليمين عندنا مرطب ملون من فيزيشنز فورميلا و من اليسار افينو 

البيبي كريم نفس فكرة المرطبات الملونة تقريبا = تغطيتها خفيفة و في منها انواع 

الحلو فيها بتبقي بشرتك طبيعية كانك ما حاطة شيء و بنفس الوقت بتعطيكي تغطية حلوة بتعزز لونك اكثر بعد ما بيكون مبين باهت

من اليمين عندنا بيبي كريم نو7 للبشرة العادية / الجافة 

و من اليسار بيبي كريم غارنييه الغني عن التعريف للبشرات المختلطة و الدهنية 

الاساس الستيك = للبشرات العادية / المختلطة و الدهنية

اذا كانت بشرتك جافة ممكن تستخدميه بس ضروري جدا قبله ترطبي بشرتك مرارا و تكرارا و تجهزيها عالمزبوط 

و في عندنا من ميبيلين فيت مي ستيك اللي انا شخصيا بحبه و بستعمله غالبا للهاي لايت الثقيل تحت عيوني / منطقة الذقن /  فوق الشفايف / وسط الجبهة 

اخيرا 

اساس ليكويد = للبشرات المختلطة و الدهنية 

في عندنا اساس من ريفلون كلر ستاي كتير حلو و دايما بنصح البنات فيه 

و من نيوتروجينا اساس اكثر من رائع بيشبه كتير اساس نارس شير جلو و يعتبر بديل ارخص له

في كتير انواع اخرى بس تطبيقها صعب شوي كمبتدئة فخليكي مع هالانواع اللي ذكرتها احسن بكتير 

ملاحظات : 

- ادمجي اساسك كتير منيح كل ما دمجتيه على بشرتك كل ما بيطلع احلى و طبيعي فما تدمجي شوي و تفكري انه خلاص العملية خلصت

 و كله تمام لا خذي وقتك بالدمج و ما تنسي مطرح منبت الشعر و الرقبة 

- غلط الفكرة اللي بتقول كل ما زودتي كمية الاساس كل ما مكياجك حيكون احلى لا الموضوع ما بيفرق ابدا بكمية قليلة فقط فيكي توزعيها على كامل وجهك لهذا قلتلك بالملاحظة الاولى ادمجي و وزعي اساسك جيدا يعني ما تحطي كمية على نص وجهك اليمين و كمية على نص وجهك الشمال و كمية على مستوى الجبهة  "سوبر سوبر سوبر غلط" لا كمية واحدة قليلة على الوجه كله كافية جدا

 و مرايتك قدامك في حالة ما اذا حبيتي تغطية اعلى ساعتها ممكن تضيفي طبقة اخرى 

- اختاري نفس لون بشرتك لا افتح ولا اغمق 

طريقة توزيعه :

عندك خيارين يا اما الاسفنجة الدائرية مثل اللي عندنا بالصورة من ريل تكنيك و ممكن كمان تستعملي الاسفنجة من النوع العادي سواء اللي شكلها مربع او مثلث او دائري 

و الفرش اللي شكلها دائري بتسهل عليكي عملية توزيع الاساس بشكل جد جد جد محترف و في نموذجين من ريل تكنيك عندنا بالصورة 

من اليمين : Buffing Brush من مجموعة Core Collection للوجه يعني ما بتنباع لحالها بشكل منفرد لا بتيجي مع مجموعة 

و الصورة الاخيرة : اسمها Expert Brush كمان من ريل تكنيك بس هاي بتيجي لحالها 

تجنبي دايما هالنوع من الفرش لانها بتطلع خطوط و يمكن تكون شوي صعبة عليكي كمبتدئة

 بس في حالة ما اذا كنتي مصرة على استعمالها خليكي ماشية على الطريقة العمودية يعني مش مرة عمودي و مرة تقلبي الفرشة افقي هيك حيطلعك خطوط فانتبهي من هالنقطة 

الكوركتر = المصحح 

شغلته مثل اسمه بالضبط "مصحح" اذا بدك تخفي بتختاري لون اغمق منك بدرجة

 اذا بدك تضيفي اضاءة بتختاري الافتح منك بدرجة كمان الى درجتين 

بس في الوان اخرى انا اكيدة انكم بتشوفوها بس مستغربين من وجودها بعالم المكياج و اكيدة انكم بتتسائلوا عن وظيفتها 

هالصورة تختصر كل الالوان الموجودة لتصحيح اي مشكل عندك بالبشرة 

- الابيض او اي لون فاتح للتنوير او الاضاءة 

- البيج بيخفي اي شيء لونه بنفسجي مثلا خبطة الله ينجيكم يتحول لونها للازرق او بنفسجي او اذا تحت عيونك ازرق / بنفسجي

- الاورنج للهالات السوداء ممكن كمان تستخدمي روج شرط يكون مطفي 

- البنفسجي بيصحح اللون الباهت او الشاحب و بيرجع البشرة لحيويتها

- الاخضر في حالة ما اذا كنت تعانين من احمرار بالبشرة كمان ممكن تستخدميه لاخفاء الحبوب 

- البينك : للبثور او الحبوب او تحت عيونك يعني اي منطقة تحول لونها للاخضر

- البينك الفاتح للاضاءة كمان و للتنوير 

في بعض الباليتس = علب حلوة من الدرجستور عندها هالالوان 

باليت من الف 

من ايسنس

من كاتريس 

طريقة توزيعه : عادي جدا استعملي اصابعك و طبطبي 

الكونسيلر :  خافي العيوب

اوعك تستخدميه تحت عيونك و انتي عندك هالات لازم بالاول تحطي المصحح اللي حكينا عنه من شوي بعدين بيصير ينفع تحطي بعده الكونسيلر 

حتى لو ما شاء الله ما كنتي بتعاني من شيء بشوف انه مهم يكون عندك 

المكياج بلا كونسيلر ما بيسوى شيء الصراحة دايما حتحسي انه في شيء ناقصك سو حتى لو ما عندك هالات او حبوب او بثور تخفيها استعملي شوي تحت عيونك بطريقة الطبطبة او باستعمال فرشة يكون حجمها صغير 

و ممكن تستخدمي الالوان البيضاء او الافتح من لونك بدرجتين للاضاءة القوية هايلايت يعني 

رشحتلكم 3 كونسيلرز بحبها :

ميبيلين فيت مي 

نيكس اتش دي 

لاستينغ بيرفيكشن من كوليكشن 

الباودر = البودرة 

ما في فرق بين البودرة المضغوطة او الحرة الاثنين عندهم نفس الدور و نفس الوظيفة 

بس الحرة بشوف انها احلى ليش لانها بتعطيكي نهاية طبيعية 

و بحب اثبت فيها تحت عيوني مناسبة للبشرات العادية المختلطة و الدهنية اكثر شيء

عندنا اتش دي من نيكس اللي تعتبر بديل ارخص لاتش دي من ميك اب فوريفر 

و اللي بشرتها دهنية بزيادة او عادية و حابة اللوك المطفي بنصحها بريميل ستاي مات اللي بيمتص دهون البشرة و بيخفف من لمعانها  
اختاري الدرجة الانسب لك و القريبة من لونك و اذا كنتي بيضاء بزيادة اختاري ال Transparent 

البشرات الجافة عموما ما تحتاج للبودرة الا باستعمال كمية قليلة بس لحتى تثبت فيها المكياج 

طريقة توزيعها :

طريقة سهلة كلكم بتعرفوها و الفرشاة اللي بتستخدموها فرشة دائرية كبيرة

كل ما كانت لارج اي كبيرة كل ما الباودر تبعك حيتوزع بالطريقة الصحيحة 

Powder Brush من ريل تكنيك 

البرونزر 

اللي دوره يضيف شوية حيوية و لمعة صحية على البشرة الشاحبة في ناس كتير سالتني هل البرونزر مناسب للبشرات الفاتحه بحب خبرهم ايه اكيد و لهذا السبب في كذا درجة من الافتح للاغمق بالبرونزر و انتي بتختاريها اغمق من لونك بدرجة او اثنين 

طبعا بحب ذكرك بشيء مهم اذا بدك هالحيوية و هاللوك المصحصح اختاري البرونزرز اللي فيها لمعة حتى لو خفيفة اما اللي مطفية استعمليها اذا كنتي عاملة تان او اذا حبيتي تعملي كونتور لتحددي فيها ملامح وجهك

 ما رح عن موضوع الكونتور بهالبوست و ان شاء الله عن قريب رح نزل موضوع مفصل عنه 

من اليمين :

- فيزيشنز فورميلا 

- ذا بودي شوب

- ريميل

- الف باليت بيجي فيها بلاشر و برونزر 

البلاش / البلاشر = احمر الخدود 

طبعا الطلة ما فيها تكمل الا مع البلاشر في كتير بلاشرات حلوة من الدرجستور اخترت لك 4 من اللي بحبها شخصيا :

- سليك 

- ميلاني 

- نيكس

- بورجوا "مع انه مش ثابت كتير بس بحب الوانه المتعددة و المختلفة"

اذا كنتي بيضاء او حنطية : اختاري الدرجات الفاتحة الهادئة من البينك / المشمشي / البني الفاتح 

اذا كنتي سمراء او قمحية : اختاري الدرجات الغامقة مثل البينك الغامق / الموف / العنابي ...






ملاحظات :

- لحتى يثبت البلاشر الباودر لوقت طويل دايما امزجي ما بين لونين و وزعي على خدودك يعني مثلا المشمشي مع البينك و هكذا 

- اذا كانت بشرتك جافة استعملي بلاشرز كريمية او سائلة 

- اذا دهنية او مختلطة استعملي بلاشرز باودر

- اما اذا كانت بشرتك عادية فانت محظوظة كل شيء بيناسبك 

في عندنا انواع اخرى من البلاش مش بس البودرة لا في الكريمية و السائلة
من اليمين من الف بلاش سائل بتحطي منه شوي صغيرة لانه فظيع خخخ اذا حطيتي كتير رح تخربي الدنيا فحطي بس شوي و وزعي باصابعك فقط 

و من اليسار من ريفلون بلاش على شكل كريم 

طبعا في من بورجوا و سليك و نيكس و الف و ميبيلين بس اخترت 2 فقط لانه من غير شيء الموضوع طويل ما بدي تكرهوني خخخ

و اخيرا من ناحية الثبات البلاشرز الكريمية و السائلة افضل بكتير من البلاشر باودر 

الهاي لايتر / هايلايت = اضاءة = لمعة صحية 

الهايلايت كمان انواع نوع بيجي على شكل قلم و نوع سائل و نوع بودرة اللي بتعطيكي لمعة خفيفة نضرة 

 اماكن توزيعه : 

فوق الشفاه - الذقن - وسط الجبهة - عظمة الخد 

ملاحظة :

اوعك تحطيه تحت عيونك لانه الهايلايت انواع هذا النوع بيعطيكي لمعة صحية لبشرتك 

اما الكونسيلر الفاتح جدا اللي بنحطه تحت عيوننا نوع هايلايت اخر و اللي هو ابراز منطقة ما و تنويرها بشكل ملحوظ الشيء اللي بيخليها واضحة و بارزة اكثر

بخاخ مثبت للمكياج

اخر شيء بنحتاجه بمكياج الوجه هو بخاخ مثبت للمكياج لحتى ثباته يطول بدون ما يسيح يعني تطلعي تسهري تروحي عرس و انتي مطمنة على مكياجك 

- كيكو 

- نيكس الاسود بيعطيكي مات فينيش يعني لوك او نهاية مطفية 

- نيكس الابيض عكس الاسود اذا بدك لوك ديوي 

- الف 

و خلصنا اخيرا اللي بتعرف تزغرد تسمعنا لاني تعبت و انا عم اكتب خخخ بس فداكم اكيد 

اذا في عندك اي سؤال تفضلي 

اسفة اذا طولت او اذا كان شرحي مش مفهوم حاولت استخدم مفردات مفهومة و لكن طبعا 

اذا في شي مش مفهوم عندي استعداد اشرحلكم مرة اخرة

اذا حبيتوا الجزء الاول و تحمستوا للجزء الثاني خبروني لحتى ما اتاخر عليكم و انزله بعد كام يوم 

تابعوني على تويتر دايما و اسالوني قد ما بدكم بالاسك 

شكرا لتشجيعكم و متابعتكم الي 

مضبوط لسه حتى ما وصلت لل 10.000 متابعة بس مبسوطة بدعمكم و تشجيعكم و بهالرقم البسيط

 اللي بالنسبة الي كبير - شكرا من القلب 

و دمتن في رعاية الله :)