Ways To Use Johnson's Baby Collection | طرق استعمال مجموعة جونسون للاطفال

بونسوار صبايا كيف الحال؟

اليوم رح اشارككم مجموعة من الطرق حول كيفية استعمال مجموعة جونسون للاطفال في حياتنا اليومية كل مرة كنت اكتشف شيء جديد بهالمجموعة لدرجة اني قلت انه كان لازم يخصصوها لالنا نحنا مش للاطفال بما انه نحنا اللي ممكن نستغلها اكثر خخخ

يمكن بعض الطرق صرتوا تعرفوها خلاص و يمكن موضوعي مش جديد 100% بس مع ذلك حبيت اشارككم فيه يمكن تلاقوا معلومة جديدة تحبوا انكم تجربوها 

 ان شاء الله الموضوع يعجبكم و نبدا بسم الله المجموعة مكونة من "بودرة - زيت - لوشن - شامبو"

 رح نبدا مع الزيت :

 الزيت معروف انه معمول لدلك جسم الطفل بس تعالوا نشوف كيف نحنا كصبايا حنتسفيد منه

 استعمليه لازالة شعر جسمك : حطي منه على المنطقة اللي بدك تشيلي الشعر منها هالشيء بيخلي الشعر يرطب و يلين فتتم 

عملية الحلاقة بكل سهولة و النتيجة بتحصلي على منطقة ناعمة 

 مساج لجسمك : حطي الزيت على جسمك و قومي بتدليكه و اعملي مساج لنفسك للتقليل من التوتر و الحصول على الراحة 

 مزيل المكياج : استعمليه لازالة مكياج وجهك عامة و مكياج عيونك بصفة خاصة 

 لمعالجة تشقق رجلك : يعني بعد ما تشيلي الكعب اغسلي رجليكي و حطي الزيت على  مكان التشقق اللي غالبا بيكون بالكعب "كعب الرجل" لترطبي المنطقة و تشيلي منها التشقق 

 مساج للاظافر : قبل ما تحطي طلاء الاظافر اعملي مساج لاظافرك من خلال وضع الزيت عليها هالشيء بيخلي اللون يبين احلى و يتوزع بطريقة سهلة 

الشامبو :

 منظف لفرش المكياج : كتير منكم بيعرفوا هالمعلومة شامبو جونسون رائع في تنظيف فرش المكياج الطريقة سهلة بتضيفي كمية من الشامبو باناء فيه شوية ماء بتضعي الفرش داخل هالاناء و بتتركيها الى ان تنظف بشكل جيد

  "حاولي تنظفي فرشك مرة بالاسبوع"

 مقشر للجسم : اصنعي لنفسك مقشر للجسم خلال 5 دقايق باستعمال الشامبو + السكر بتمزجيهم سوى و بتحصلي على مقشر حلو و ناعم لجسمك

 مزيل المكياج : كمان الشامبو رائع في ازالة مكياج عيونك بالاخص خذي قنينة فارغة و اصنعي لنفسك مزيل مكياج يتكون من 125 مل ماء + ضيفي على الماء ملعقة كبيرة من الشامبو + نصف ملعقة من زيت الزيتون اغلقي القنينة باحكام و حركيها ليمزج كل من الزيت الزيتون و الشامبو مع الماء و شيلي مكياجك بطريقة ناعمة و سهلة و ما بتحرق العين 

شامبو للكبار : اللي فروتها جد حساسة فيها تستعمل هالشامبو و هي مطمنة على شعرها و فروة راسها

البودرة :

تفتيح لون الفاونديشن : اذا كنتي تعانين من صعوبة ايجاد لون الاساس المناسب لبشرتك خصوصا صاحبات البشرة البيضاء جدا فيكي  تضيفي علي الفاونديشن تبعك البودرة شوي شوي الى ان يفتح اللون

بعد الشاور : وزعيها على جسمك بعد الاستحمام لنعومة الجلد و تزويده برائحة ناعمة 

 تثبيت المكياج : فيكي تستعمليها لتثبتي فيها مكياجك و تحت عيونك بصفة خاصة

 شامبو جاف : هالمعلومة ماما قالتلي اياها من زمان كتير كل ما كان شعري يتزيت من الفروة و اكون مستعجلة عالروحة عالمدرسة كانت تجيب البودرة و تحطها على راسي بعيدا عن الفروة و تفرك شعري بطريقة ناعمة و النتيجة دايما كانت روعة كاني لسه ماخذة دوش و عاملة سيشوار 

سواد الرموش : كلنا بنحب الرموش السوداء الكثيفة الطويلة فيكي تحصلي على هالسواد بوضع الباودر على رموشك كلها قبل ما تحطي الماسكارا و بس تحطيها بعد ذلك رح تحسي بفرق و بسواد مش معقول صحيح ممكن تستعملي نفس الماسكارا و نفس الليكويد بس حتحسي كانه في شيء جديد حاطتيه و السر كله بالباودر زيادة على ذلك الباودر بتساعد على توزيع الماسكارا بكل سهولة الشيء اللي حيخلي رموشك تلقائيا تتفرق و تطول و ابدئي دايما من جذور الرموش لتحصلي على نتيجة مثالية

طرق اخرى خارج عالم الجمال بس مهمة لكل صبية بتحب تهتم بنظافة كل شيء حواليها مو بس شكلها و هي كالتالي : 

 رشي الباودر على سريرك بعد ما ترتبيه حتحسي كانك غيرتي الغطاء مع انه ذات نفسه بس الباودر بيمتص الزيوت و العرق و كتير اشياء لا ترى بالعين المجرد 

 رشي منها شوي ما بين رفوف الملابس لرائحة ناعمة و نظيفة 

 فيكي تشيلي الزيوت من على ثيابك باستعمال الباودر 

و اخيرا رشي الباودر جوا اي حذاء او كعب رح تلبسيه لتحافظي على رجليكي من التشقق و التعرق و الرائحة البشعة 

اللوشن :

 اله استعمال واحد معروف : 

 بعد الشاور استعمليه كمرطب للجسم او كلوشن معطر

 و حطيه بعد حلاقة القدمين لتنعيمها  

اضافة :

 المناديل المبللة :

 ممكن تزيلي فيها العرق : اوقات بتكون انعم و احلى على بشرتك من مزيلات العرق 

 و فيكي تستخدميه كمزيل لبقايا المكياج خصوصا احنا المدونات لنوضح الوان المستحضرات بنعمل كذا سواتش لنحكي عن منتج معين و بالمناديل المبللة بتسهل علينا عملية مسح المكياج من الايد 

  

ان شاء الله تكونوا حبيتوا البوست 

دمتن في رعاية الله :)