C&C Morning Energy Facial Wash / Scrub Review + Morning Routine For Oily/Combination Skin

بونسوار صبايا كيف الحال؟

موضوع اليوم ريفيو بسيط عن منظف و مقشر كلين اند كلير "Morning Energy" بالاضافة الى مرطب تفتيح البشرة

 رح نبدا من اليسار و عندنا الغسول اليومي و هو عبارة عن منظف رائع خالي من الكحول و خالي من الزيوت يعني مناسب جدا للبشرة الدهنية و المختلطة من مميزاته بيخفف من لمعان الوجه و بيشيل الدهون كلها تقريبا

 بس خليكم من كل هذا انا احلى شي حبيته بهذا المنتج تركيبته اللي بتصحيكي من النوم غصب يعني مش طبيعي اول ما بتحطيه على وجهك على طول رح بتحسي بانتعاش و حيوية 

و خصوصا اذا طلعتي الصبح بكير و يصير الهوا البارد يلامس وجهك وااااو شعور روعة
 *اوقات بدعي بشرتي تصير دهنية بس لاستعمله و صحصح* خخخ لانه حاليا بشرتي ما بين العادية و الجافة فما بيصير استعمله لازم استنى الصيف لحتى اقدر ارجع استعمله بما انه بالصيف بس بتصير بشرتي تلمع و دهون و فضايح خخخ 

  من اليمين عندنا المقشر و هو خالي من الزيوت كمان + غني بالفيتامين C اللي تحتاجه اي بشرة تعمل تركيبته على ازالة الخلايا الميتة و الدهون و الاوساخ و هو مناسب للبشرة الدهنية و المختلطة

و ممكن كمان صاحبة البشرة العادية تستعمله بس ما بنصح ابدا فيه صاحبة البشرة الجافة و الا رح يخرب بشرتك و رح يخليها جافة اكثر و حيطلعلك قشور كمان 

 بالنسبة للحبيبات فهي ناعمة جدا يعني اذا كانت بشرتك دهنية بزيادة ممكن تستعمليه مرتين بالاسبوع اما صاحبات البشرة المختلطة و العادية مرة بالاسبوع كافية جدا "مظبوط كاتبين للاستعمال اليومي" بس انا مو مع هالنظرية ابدا يعني حتى و ان كانت بشرتك دهنية بزيادة و حتى و ان كان مكتوب للتقشير اليومي مرتين بالاسبوع كافية جدا

و اخيرا عندنا المرطب لتفتيح لون البشرة :

 يرطب الوجه + يفتح لون البشرة و تبان النتيجة بعد المداومة + يحتوي على SPF  بنسبة 15 و هي اقل درجة يعني اذا كنتي ما بتتعرضي للشمس كتير + و في حالة ما اذا كانت بشرتك من النوع اللي ما بتتاثر بالشمس بطريقة ملحوظة بنصحك فيه و حيناسبك

 اما اذا كان العكس ما حيناسبك و اختاري واقيات شمس او غير مرطبات اللي تكون بتتوفر على عامل الحماية بنسب كبيرة وعالية 
40 - 50 و 60


من خلال تجربتي معه حبيته كتير و نفعني بالترطيب و صرت مش قادرة اطلع من البيت بدونه بحسه بيز او كريم اساس
*بما اني ما بستعمل الاساس بالصباح و بدور على اللوك الطبيعي* بلجئ لهالمرطب اللي بيؤدي وظيفته بالترطيب زيادة على ذلك بيوحدلي لون بشرتي و بيعطيني اشراقة جميلة جدا تناسب اجواء الصباح

 يعني اعتبري هذا البوست روتين يومي او صباحي بالخصوص و اعيد و اكرر فقط لصاحبات البشرة الدهنية او المختلطة المقشر بس اللي مناسب لبعض البشرات العادية و اللي انا منهم 

طريقة استعمال المنتجات الثلاث :

 بداية بللي وجهك و ضعي القليل من المنظف الى ان تحصلي على رغوة خفيفة بعدين اشطفي وجهك منه

بعدين ضعي المقشر مرتين بالاسبوع اذا كانت بشرتك دهنية كتير و اذا كانت مختلطة او عادية اكتفي باستعماله مرة بالاسبوع  و ان كانت الحبيبات صغيرة و ناعمة وان كان مكتوب على المنتج "للاستعمال اليومي/الصباحي" مثل ما سبق و ذكرت افركي شوي بطريقة ناعمة على كامل وجهك و ما تنسي الرقبة و اغسلي وجهك 

 ثالث شيء بتستعملي التونر اللي هو قابض المسام الخاص فيكي او ممكن تستعملي ماء الورد كتونر 

نفس الفعالية و نفس الوظيفة بيؤدي و النتيجة احلى و مضمونة بعد لانه كلنا بنعرف اهمية ماء الورد للبشرة 

و اخيرا بتوزعي المرطب على كامل وجهك و رقبتك و ابدئي صباحك بنشاط و ثقة 

 

نصائح : 

- لا تملي بسرعة من المستحضرات يعني لا تستعملي المنتج مرة واحدة و بعدين تقولي لا ما لقيت اي نتيجة رح غيره داومي عليه و استمري عليه لمدة شهور و بعدها احكمي و قرري

-  لا تملي كمان من العناية اليومية لانه اللي عم نعمله احنا هو وقاية و عناية مو تجميل ربع ساعة و خلاص و بتحصلي على النتيجة المطلوبة لا اذا بدك توصلي لنتيجة مرضية استمري بعملية العناية و داومي عليها و رح بتشوفي كيف هالعناية حتفيدك بعدين و كيف رح تحميكي من كتير قصص بالمستقبل

- هذا البوست خاص بصاحبات البشرة الدهنية و المختلطة فقط باستثناء المقشر ممكن يناسب بعض البشرات العادية

- اذا كانت بشرتك حساسة لا تستعملي المنتوجات الصناعية استعملي المنتوجات الطبيعية او الطبية اضمن 

-  العنايه لا تقتصر فقط على العناية الخارجية كريمات و منظفات الخ ... 

لازم تلتزمي كمان بالتغذية السليمة - شرب الماء الكافي -الاكثار من شرب العصائر و اكل الفواكه - النوم الكافي  ...

- مو شرط اللي ينفعني ينفعك انا ما انصح الا بعد ما بجرب و اخذ فكرة بس ممكن الاشياء اللي تنفعني ما تنفعك يعني جربي بالاول و خذي فكرة و اختاري المستحضر الانسب الك و داومي عليه   

شكرا على المتابعة و دمتن في رعاية الله (: