Moroccan Hammam | الحمام المغربي

بونسوار صبايا كيف الحال؟

اليوم موضوعنا حيكون عن الحمام المغربي و طريقته الصحيحة  

 السبب اللي خلاني اكتب عن هالموضوع اولا كثرة الاسئلة عنه و كثرة الاجوبة الغلط عنه الشيء اللي استفزني كتير صراحة خصوصا بعد ما شفت بنات مصدقة بعض المعلومات الغير صحيحة و بتتبع طرق غلط كليا بسبب ناس ما عندها ضمير غرضها بس تزيد عدد المتابعات او يمكن لانه هالناس نفسها اخذت معلومات غلط من ناس اخرى و انتشرت العدوى خخخ 

ما في شي اسمه سر و ما سر اذا في انسانة بيضاء فهذا اول شيء خلقة ربنا ثاني شيء عامل الوراثة

و من المعلومات الغلط الشائعة كثرة المنتجات المبالغ فيها اللي بيعرضوها للناس و الموضوع بالحقيقة ابسط من هيك بكتير ما بيحتاج الا 8 منتجات ب 10 دولارات و خلصت الحكاية 

ثاني معلومة بتستفزني و كتير بزعل على الناس اللي بتصدقها "سر بياض المغربيات بالحمام المغربي"

 طبيعي واحدة امها و ابوها و جدودها بشرتهم فاتحة تطلع بيضاء يعني انسي انك تكوني سمراء تصيري بيضاء قال كيف "بالحمام المغربي" الموضوع عبارة عن تفتيح لون البشرة و بالاخص المناطق الداكنة بالجسم و كله بيتم عن طريق التقشير و التنظيف و الترطيب "لاحظي كلامي قلت تفتيح مو تبييض"

و النتيجة فعلا موجودة و لونك بيتوحد و المناطق الغامقة بتفتح مع المداومة بس انك تكوني مفكرة انك رح تتحولي من سمراء لبيضاء هذا الشيء مش موجود و اللي بتقلك هالحكي ضربيها كف بس لا تحكيلها انا اللي قلتلك خخخخ   

الحمام المغربي عندنا بينعمل مرة بالاسبوع لا اكثر ولا اقل 

و يتم بمكان شعبي جدا بنسميه "الحمام" اللي بيكون موجود بكل حي بكل منطقة بكل مدينة بالبلد بنشتري التذاكر اولا بدولار واحد او اقل و بنقضي الوقت اللي بدنا ياه جواته 

هالحمام مساحته كتير كبيرة و مقسم الى اربعة اقسام اول غرفة لتبديل الملابس بعدين بتفوتي بالملابس الداخلية فقط شايلة معك سلة محتواها الشامبو و الزيوت و احتياجاتك كلها و سجادة بلاستيكية لتقعدي عليها و الدلو

 ثاني غرفة باردة نسبيا الثالثة ساخنة و الرابعة ساخنة جدا جدا و كل واحدة بتختار المكان اللي بيناسبها طبعا و بكل غرفة من هالغرف صنابير للماء الساخن و البارد 

و هالغرف بتضم كذا و 20 سيدة و هذا اكثر شيء انا شخصيا بكرهه لانه الواحد ما بيكون على راحته حتى اذا كان مع اهله الموضوع مخجل بس لانه مهم و ما فينا نستغني عنه بنروح يا كتير بكير يا متاخر ليكون المكان فاضي و احيانا اخرى بناجر المكان بس لالنا و كل واحدة بتاخذ غرفة 

الحمام يضم عاملات او سيدات يقمن بخدمة الزبونات و بيساعدونا بكذا شغلة مقابل شيء صغير في ناس بتعطي 5 دراهم و ناس 10 و ناس بتعطي اكثر المهم الواحد ما يكون قليل ذوق و يعطي قد قدرته و يشكر من قلبه 

هذا كان تعريف مبسط للحمام المغربي بننتقل دغري على لوازم هالحمام و طريقته الصحيحة و اسمعوها مني مش لانه انا الافضل اكيد و لكن لاني مغربية ابا عن جد يعني ما رح افتي و احكي اشياء غير صحيحة

بالنسبة للوازم الحمام المغربي شفت ببعض المنتديات عجقة و لوازم مبالغ فيها و شي 20 خلطة خخخ و الله يا بنات الموضوع جدا بسيط و اللوازم ابسط و مثل ما حكيت بالاول 10 دولارات كافية لتجيبلك هاللوازم كلها و اللي هي : 

- الصابون البلدي او بيسموه بالبلدان العربية "الصابون الاسود" او "الصابون المغربي"

 في انواع اللي مكون من زيت الزيتون و نوع بالاركان و اعشاب اخرى و لكني افضل الصابون البلدي العادي بدون اضافات و اللي مكون من زيت الزيتون و هو اللي بالصورة 

- الغاسول "الطمي او الطين" مثل ما شايفين بالصورة بيكون عبارة عن قطع صغيرة رمادية بتحطيها تحت الشمس شي يومين بعدين غربليه و كل ما تكوني حابة تعملي حمام بتاخذي الكمية بس اللي رح تحتاجيها و بتخلطيها مع ماء الورد "3 ملاعق كبيرة" و خذي حذرك و انتي عم تشتريه لازم تنبهي البائع انه بدك غاسول الجسم لانه في غاسول للجسم و في غاسول للوجه اللي بيكون ابيض و للشعر اللي بيضاف اليه بعض الاعشاب  

- الكيس "الليفة المغربية" و هي عبارة عن ليفة خشنة بتساعدك على ازالة الخلايا الميتة و الاوساخ 

  - ماء الورد و مثل ما شايفين بالصورة بفضل 2 لحد هالوقت "القلعة و قلاع مكونة اللي بعتبره الافضل على الاطلاق - بدون كحول" و بحسه ماء ورد حقيقي بيور جدا جدا جدا و بنصح فيه كتير 

- صابون طبيعي "صابونة الطاووس" اللي تقريبا كلنا بنستعملها و بنفضلها طبعا فيكي تستبدليها باي صابونة طبيعية اخرى في حالة ما اذا ما لقيتيها  

- الحجر الخفاف "حجر خاص بالاقدام بيشيل منه الجلد الميت و بيرطب الخشونة اللي بكعب القدمين في منه انواع و اللي بستعمله حاليا من سالفيتاس فيكي اكيد تختاري اي نوع ما رح تفرق كتير 

 - عصير الليمون او الحامض لانه في مناطق بالمغرب بيسموا الليمون "الحامض" 

- الليفة اللينة الخاصة بالصابون جبتها من ايف روشيه حلوة و ناعمة على الجسم 

 

 تعتبر هاللوازم اساسية للحمام المغربي و في اشياء اخرى ثانوية و كل منطقة او بيت معين يعتمد على خلطات معينة حسب 

الاحتياجات يعني اذا ما توفرت ما في مشكلة اللوازم اللي فوق بتكفي و بتوفي و تعتبر اساس الحمام المغربي 
في ناس مثلا بتستعمل الحناء - الخزامى - قرنفل - اعشاب طبيعية الخ ... 
بالنسبة الي انا ما بستعمل الا اللوازم الاساسية لانها كافية جدا و بضيف عليها  "العكار الفاسي - نيفيا" لتوريد البشرة يعني اذا حابة نفس الشيء ضيفي على اللوازم اللي فوق : 

- العكر الفاسي  او " دم الغزال" عبارة عن حبيبات حمراء داكنة دوره بيورد الجسم و البشرة و الشفاه و كانوا ناس زمان بيستعملوه في تزيين العرايس "روج - بلاشر - جسم مورد و ناعم" 

- كريم نيفيا العادية

طريقة الحمام المغربي :

يتميز الحمام المغربي بالسخونة الشديدة و كل شيء مسكر شباك واحد ما لازم يكون مفتوح و البخار و التعرق الشيء اللي بيساعدك تتخلصي من الاوساخ بكل سهولة 

و عادي على فكرة تستعملي هالطريقة بالبيت سكري الشبابيك و املئي البانيو بماء ساخن جدا و لازم يصير حمامك كله بخار طبعا ما رح اكذب عليكي و قلك رح تحصلي على نفس نتيجة الحمام المغربي الشعبي و لكن النتيجة قريبة و حلوة و اعيد و اكرر الحمام الشعبي مو الساونا و ديكور غير شكل و راحة و استراحة الحمام المغربي اذا ما طلعتي منه مقتولة و قلبك بيدق بسرعة و وجهك احمر كانك كنت بتحاربي ما بيكون اسمه حمام خخخ  

يعني وفري فلوسك هالحمامات المغربية المودرن مجرد خزعبلات و ناس بتبالغ باسعارها و تسرق فلوس العالم لانه الحمام المغربي صار حديث كل الصبايا و السيدات و صار مطلوب جدا من قبل العرايس و حتى الناس العادية ففرصة الهم يعني انه يكسبوا و يسرقوا على راحتهم 

 نرجع لموضوعنا و طريقة الحمام المغربي بالحمام بصفة عامة او ببيتك خصوصا لانه هالموضوع كتبته بالاخص لاخواتي بالعالم العربي لانهم اكثر من يسالوا على طريقته و اللي هي كالتالي : 

- اولا  و قبل كل شيء شيلي شعر جسمك كله و ابدئي دايما بغسل شعرك اولا "شامبو بلسم زيوت ماسكات الخ " و اجمعيه بفوطة ننتقل للجسم 

-  سكري شبابيك حمامك كلها و املئي البانيو بماء ساخن جدا جدا و لازم يصير حمامك كله بخار و تتعرقي اقعدي جوا البانيو 15 - 20 دقيقة 

- اطلعي من البانيو جيبي كرسي و اقعدي عليه لانه الطرق الجاية ما لازم تنعمل جوا البانيو او تحت الدوش وزعي الصابون البلدي على جسمك و رقبتك كانك بتحطي كريم خليه 10 دقائق و بعدين اشطفي جسمك جيدا 

- جيبي الكيس او الليفة المغربية الخشنة بلليها و افركي فيها جسمك كله بعد ما تشطفي جسمك كتير منيح من الصابون البلدي مش مثل ما بعض الناس بتحكي "فركي جسمك بعد ما توزعيه"  غلط غلط غلط اشطفيه بالاول بعدين افركي جسمك كله "بحركات دائرية من تحت لفوق" و ما تنسي رقبتك و منطقة الصدر و الابطين و بين الفخود و الارداف و المنطقة الحساسة و حتى وجهك عادي ما تخافي انما افركيه بالهداوة مو بالقوة و استعيني باختك لتفركلك ظهرك

 "افركي بقوة الجسم و الرجلين لتتخلصي من الاوساخ بسهولة تخيلي حالك بتحاربي يا ستي خخخ بس طبعا مو لدرجة انك تسلخي جلدك" و رح تلاحظي اوساخ و خلايا ميتة عبارة عن خيوط بيضاء و رمادية 

- اشطفي جسمك و جيبي خليط "ليمونة معصورة + ملعقتين كبار ماء ورد و بللي قطعة قطن بهالمزيج و امسحي المناطق الحساسة للتفتيح خصوصا للناس اللي بتستعمل شفرات الحلاقة لانه يوم بعد يوم من استعمال الشفرات قد يؤدي لسواد المناطق الحساسة و حتى اذا كنت بتستعملي الحلاوة او الشمع "للنظافة و الاطمئنان و لكل شيء يكون بيرفكت"  و اشطفي بعد مرور 15 دقيقة

- في هالاثناء و انتي عم تنطري الوقت يفوت خذي الحجر الخفاف و دلكي فيه رجليكي

خصوصا منطقة الكعب ليرطبها و يشيل منها الخشونة و الخلايا الميتة 

- اشطفي جسمك و خذي الصابون الطبيعي انا بستعمل الطاووس و اغلبنا بنستعمل صابونة الطاووس و خذي الليفة اللينة و افركي جسمك بطريقة لينة "اذا ما لقيتي صابونة الطاووس عندكم استعملي اي صابونة طبيعية مثل صابون العسل مثلا" 

- اعملي خليط الغاسول او الطين / الطمي "3 ملاعق كبيرة ماء الورد" و وزعيه على جسمك و رجليكي و اشطفي جسمك بعد مرور 15 دقيقة "الغاسول دوره بيرطب البشرة و بينظفها و بيشيل منها الرواسب المضرة بالبشرة و بيفتح لونها مع المداومة"  

ملاحظة صغيرة : المفروض يكون اثقل من الصورة بشوي

- و اخيرا في حالة ما اذا كنت حابة توردي بشرتك اصنعي خليط العكر الفاسي + ماء الورد

صورة من النت

ملعقتين ثلاثة من ماء الورد و نتفة فقط من العكار الفاسي لان لونه قوي فدايما حاولي ما تحطي منه كتير و امسحي جسمك كله فيه ضلي شي 20 دقيقة و اشطفي جسمك نفس الطريقة لوجهك و شفافك اذا حبيتي تحصلي على خدود و شفايف حمراء طبيعية  

صورة من النت 

 او اخلطيه مع نيفيا العادية او جليسوليد الى ان تحصلي على خليط لونه بينك نفس الشيء نتفة فقط من العكر الفاسي و وزعيه على 

جسمك ضلي 20 - 30 دقيقة و اشطفي جسمك

 في ناس ببعض المنتديات بيحكوا انه لازم تنامي يومين ثلاثة بالعكر الفاسي و نيفيا على جسمك و طبعا هالحكي كله غلط 

  
و بس خلصنا و مثل ما حكيت بالاول كل مدينة او اسرة و شخص بيضيف شغلات اخرى زيادة حسب الرغبة و الاحتياجات من خلطات و اعشاب طبيعية و خزامى و حناء بس بتضل هالطريقة و هاللوازم شاملة و اساسية 

 
 الطريقة بسيطة و سهلة بتخليكي تستغني عن كل المنتجات الاخرى لانه حمام شامل منظف و مقشر و مرطب غير فوائده الاخرى :

-  بيفتح المناطق الداكنة

 - بيوحد اللون مع المداومة 

- يذيب الشحوم

 - ينشط الدورة الدموية 

- يزيل الارهاق العصبي ... 

استمري على هالطريقة مرة واحدة بالاسبوع و رح تتفاجئي لحالك بالنتيجة الاكثر من رائعة 

و اول ما تطلعي من الحمام عادي مثل العادة نشفي جسمك جيدا بعدين وزعي لوشن خفيف و سبراي للجسم برائحتك المفضلة و نامي لانك مهما حاولتي تقاومي ما رح تقدري ما تنامي لانك بهالوقت رح بتكوني خلصانة و حابة بس تنامي و ترتاحي خخخ  

ملاحظات :

- الحمام المغربي لازم ينعمل مرة بالاسبوع فقط اكثر من هيك ما بيصير

- احتفظي باللوازم المتبقية بعلب الى ان تستعمليها بالاسبوع الجاي "الغاسول - الصابون البلدي - خليط العكر الفاسي و نيفيا"

- صابونة الطاووس استبدليها اذا ما لقيتيها عندكم بصابون العسل او اي صابونة طبيعية مرطبة من اختيارك 

- مثل ما حكيت بالاول ما في شيء اسمه تبييض الحمام المغربي بيفتح المناطق الغامقة و بيوحد اللون و ذلك عبر التنظيف و التقشير و الترطيب المتواصل 

- ما لازم تمسحي المناطق الحساسة بالليمون على طول رح يحرقك اعصريه و امزجيه مع ماء الورد بالاول و بعدين امسحي عادي بدون خوف و ممكن تستعملي هالطريقة يوميا لنتائج افضل

- اذا ما حبيتي تستعيني بحدا يفركلك ظهرك ممكن تجيبي ليفة الظهر و افركي بنفسك مع اني بفضل انه حدا يفركلك لنتيجة احسن 

ان شاء الله يكون شرحي مفهوم و اذا في شيء مش واضح او اي استفسار اتفضلي طبعا على عيني و ان شاء الله تكوني استفدتي و كل واحدة فيكم بعد ما تجرب الطريقة تخبرني و تعطيني رايها 

شكرا على متابعتكم و تشجيعكم الدائم لي 
و شكرا على دعمكم و كلماتكم اللي تسعدني و كتخليني نواصل

كنبغيكم *-*

للتواصل و للاستفسار و للسؤال عن اي شيء 

Twitter | Ask | Email

❤️ دمتن في رعاية الله ❤️