Wednesday, January 1, 2014

The Body Shop Mini Haul | Review.


بونسوار صبايا كيف الحال؟



 اليوم موضوعنا حيكون ريفيو عن بعض منتجات ذا بودي شوب اللي اشتريتها من وقت قصير و جربتها و رح خبركم عن رايي الشخصي بهذه المنتجات


 صراحة جربت فقط 3 منتجات من هذه الشركة لانها مش موجودة بمدينتي و لما سافرت على مدينة اخرى ما كنت مخططة اني رح جيب شيء لهذا السبب جبت فقط 3 منتجات ذات "الحجم الصغير"  ليش؟


هذه عادة عندي اذا حبيت اعمل شوبينج و جيب شي جديد عني و ما جربته من قبل بجيب فقط الاحجام الصغيرة و بستعملها و باخد فكرة بسيطة عنها و شوف وقتها اذا ناسبتني و حبيتها او لا اذا عجبتني برجع جيب الاحجام الكبيرة اذا لا ما بكون خسرت كتير


 اعتبروها نصيحة مني يا صبايا منها بتوفري مصاري و منها ما بتجمعي اغراض لست بحاجة اليها لانه حقيقة في بنات بتجيب كذا غرض و بعدين بتكتشف انها تسرعت او بتطلع مش مناسبتها فبتحطهم على درج عندها و تسكر عليهم و هالشيء اسمه "خسارة" فلهذا جيبي فقط الاحجام الصغيرة مبدئيا لتستعمليها و تاخذي فكرة عنها و تقرري بعدين اذا بدك تجيبي منها الاحجام الكبيرة او لا

 


 

- نبدا من على اليمين عندنا شاور جيل معمول بالكوكنت يعني جوز هند لا باس به "بالنسبة لي" و لكنه مش الافضل ولا احسن شيء جربته او استعملته انا بالعادة اي شي فيه كوكنت بطير اشتريه و هذا اول سبب خلاني اشتريه بدون ما افكر ريحته رائعة و لكن ما بتدوم اكثر من ساعة او ساعتين بالكتير و مناسب للبشرة العادية/ جافة بتحسي بجسمك بعد ما تشطفيه بالماء ناعم انما هالشيء للاسف ما بيطول كتير 

 

اللي ما عجبني فيه : ريحته مش لونج لاستينج يعني ما بتدوم + ما حسيته رطب بشرتي النعومة مثل ما ذكرت بتحسيها فقط جوا الدوش بعد ما تشطفيه بالماء و تطلعي من الحمام و تنشفي جسمك بتحسي كانك ما حطيتي شيء اساسا

 

اللي عجبني فيه : ريحته بما اني بحب الكوكنت

هل رح ارجع اشتريه مرة ثانية؟ : لا

 

- ثاني منتج هو البودي بوتر معمولة بزبدة الشيا الغنية عن التعريف اللي الها عدة فوائد و استعمالات و من اهمها "الترطيب" حقيقة هذا المنتج خيال شكلا و مضمونا طبيعة الزبدة ثقيلة مثل كل الزبد تقريبا 

 اكثر منتج بنصحكم فيه خصوصا الناس اللي بشرتها جافة/جد جافة لانه ترطيب هالزبدة خطير و بيدوم لفترة اكثر من طويلة + شكلها كيوت و صغيرة ممكن تاخذيها معك وين ما بدك + الريحة روعة كلمة قليلة كتير صراحة و بدون مبالغة يعني اوقات بحط كمية كتير صغيرة انما الرائحة بتضل بطريقة فظيعة يعني من جمالها صايرة عم حط كميات صغيرة فقط لحتى ما تخلص بسرعة خخخ

يعني بنصح فيها كتير لاي بنت او سيدة او عروس لانه منتج كامل متكامل "شكلا - رائحة و ترطيب يدوم لوقت طويل" و قليل كتير نلاقي منتج واحد فيه كل شيء نحتاجه و صدقيني ما رح تندمي 


 طريقة استعمالها : بعد ما تنشفي جسمك كتير منيح وزعي الكمية اللي بدك على جسمك + ممكن كمان تستعمليها لترطيب قدميكي و انا شخصيا عندي عادة قبل ما بنام بوزع منها شوي على الدراع و الرقبة لانه ادمنت ريحتها و بعشق ترطيبها يعني انا و نايمة بحس براحة و ريحة طالعة من الغرفة كلها و بحس حالي ناعمة "حقيقة و الله"

   

 

هل رح ارجع اشتريه مرة ثانية؟ اكيد اكيد اكيد ان شاء الله 



- المنتج الاخير هو البودي لوشن معمول بزهرة المورينجا ريحته لا باس بها و ممكن تكون حلوة للناس اللي بتحب المورينجا انما بالنسبة لي ما حبيتها ابدا حسيتها ثقيلة و قوية و مزعجة بس لما بتبرد بتخف نوعا ما و بتصير مقبولة يعني + ملمسه ناعم و خفيف + كمان مناسب و معمول للبشرات العادية/الجافة و اخيرا ترطيبها حلو و هذا اكتر شيء عجبني 

يعني اجمالا فيني احكي انه منتج حلو مشكلتي معه الرائحة اللي ما حبيتها كتير يعني اذا كنت من معجبات المورينجا توكلي على الله و جربيه لانه بيرطب و ريحته كمان بتدوم مع ان كتير قليل تلاقي لوشن جد خفيف بيرطب بهالطريقة الحلوة و المقبولة و ريحته بتدوم لاني شخصيا تعودت اذا بدي ترطيب فورا بروح عالزبد انما هاللوشن الخفيف اثبتلي العكس 


  

هل رح ارجع اشتريه مرة ثانية؟ : لا لانه ريحته بتزعجني  



 

ان شاء الله تكوني حبيتي البوست و يا رب اكون افدتك و لو شوي و تكوني اخذتي فكرة عن منتج قبل ما تشتريه و ياريت لو كان فيي اخذ اكثر من 3 منتجات لافيدكم اكثر بس ما خططت ابدا اني رح جيب شيء لانه الغرض من السفرة كان "زيارة طبية" و لما خلصت بكير قلت يلا لسه معي وقت بروح عالمول و لما رحت ما شاء الله فجاة كل شيء عجبني خخخ لو كنت مخططة ما كان في شي حيعجبني "دايما بتصير معي هالمواقف" خخخ "فيس زعلان" 

 



طبعا اللي عندها اي سؤال تتفضل و شكرا كتير على متابعتكم الي و تشجيعي 


دمتن في رعاية الله (: 

 



 

      

 

No comments:

Post a Comment