بونسوار صبايا كيف الحال ؟
اليوم رح اشارككم مشترياتي البسيطة اللي اشتريتها بالفترة الاخيرة من Avon - Estée Lauder & Clinique و رايي فيها بعد تجربتها و رح نبدا مع :
- Clinique Superbalanced Makeup Foundation : اول شيء انا من الناس اللي عندها مشاكل في ايجاد الكريم الاساس المناسب لاني كتير بيضاء و ما في كريم اساس استعملته ناسبني مع اني دايما بجيب منهم اول و افتح درجة و للاسف دايما النتيجة بتكون عبارة عن بشرة صفراء او برتقالية و يبان الفرق كبير و واضح بين لون الوجه و الرقبة صحيح نادرا ما استعمله بس ضروري منه بالحفلات و المناسبات
و للاسف كلينيك واحد من هالفاونديشنز - ما ناسبني من حيث اللون انما بالنسبة للتغطية فهو حلو و جميل جدا + مناسب جدا لصاحبات البشرة الحساسة لانه لا يحتوي على رائحة معينة و كمان كلينيك ماركة اجمالا مناسبة لصاحبات البشرة الحساسة لانها طبية و المواد المكونة منها منتجاتهم مو مضرة
كمان مكتوب عليه Oil-Free بمعنى انه مناسب كمان لصاحبات البشرة الدهنية او المختلطة + تغطية متوسطة بمعنى اذا كان عندك حبوب الخ اطمني رح يغطيلك كل شيء بطريقة حلوة
انما اللون ما ناسبني ابدا و النوعية كمان بما انه مخصص للبشرات الدهنية و المختلطة و انا هالشيء للاسف ما انتبهت عليه الا بعد ما رحت البيت فكانت النتيجة انه نشفلي بشرتي بما انها من عادية الى جافة
فحاولي ما تغلطي مثلي يعني خذي وقتك الكامل بالمحل و جربي و اقرئي بنفسك لانه بعض التجار الله يهديهم هدفهم بس يبيعوا في حالة ما اذا ما انتبهتي ما بيوجهوكي و فحالة ما اذا سالتي اي سؤال رح يقلك ايه حلو ايوة جميل ايوة رح يناسبك اكيد و بالاخير بيطلع كل الكلام كذب و غلط - اذن ركزي على كل النقط قبل ما تشتري
اللون طلع اغمق مني و الصورة توضح :

الدرجة هي : (01) Petal و اللي تعتبر افتح درجة و طبعا ما ناسبتني للاسف مثل ما شايفين بالصورة
هل رح ارجع اشتريه ؟ : لا - فقط لانه ما ناسبني من حيث اللون و طبيعة البشرة انما الجودة عالية و انصحك فيه بعد مراجعة المنتج اذا حيناسبك من حيث "طبيعة بشرتك - لونك" عشان ما يصيرلك نفس اللي صار معي
تقييمي له : ما رح احكي على اللون - 8/10
- Clinique High Impact Mascara : الحلو فيها حجمها الصغير يعني ممكن تحطيها باصغر شنطة موجودة عندك + اللون اسود غامق + سوادها يدوم لمدة طويلة + بتطول شوي فقط في حالة ما اذا كانت رموشك من متوسطة الطول الى طويلة خلقة
بالنسبة للكثافة ما شفت للاسف + بتلصق الرموش اوقات لازم كل شوي تمشطي رموشك انتي و عم بتحطيها بالنسبة للفرشاة متوسطة يعني مش صغيرة ولا كبيرة بمعنى انها سهلة التطبيق
اجمالا ماسكارا جميلة من ناحية سواد الليكويد + اذا بدك تحصلي على الطول استعملي طبقتين 3 + اذا حابة رموشك تتفرق ممكن تستبدلي فرشتها بفرشاة اخرى ذات الشعيرات القوية و المتفرقة و استفيدي من ليكويد كلينيك الاكثر من رائع
هل رح ارجع اشتريها ؟ : لا - صحيح الليكويد رائع و الماسكارا جميلة و فيها كتير ايجابيات بس مش احلى ماسكارا استعملتها
تقييمي لها : 7/10
- Clinique Vitamin C Lip Smoothie : هو عبارة عن جلوص بييجي منه كثير الوان و لكني اخترت درجة الخوخي
ما حبيته بصراحة اللون عالايد واضح بينما عالشفاف خافت + صعب التوزيع يعني بيطلع خطوط انتي و عم توزعيه الشيء اللي بيخلي منظر الشفاف بشع + ثقيل عالشفاف
ميزته الوحيده انه بيرطب شوي
اجمالا ما حبيته و ما لقيت فيه شيء مميز
هل رح ارجع اشتريه ؟ : لا - ما فيه شيء مميز و سلبياته اكثر من ايجابياته
تقييمي له : 5/10
- Avon True Colour Blush : صار من البلاشرات المفضلة عندي اول شيء سهل الاستعمال و المزج - فيه شوية شيمر بس مش واضح مثل ما شايفين بالصورة طالع مات لانه فعلا يحتوي على شيمر قليل و مش واضح - حلو جدا يعطيكي مظهر طبيعي جدا و مناسب للاستخدام الصباحي - شكل المراية كبيرة و انيقة - و شيك Packaging
الشيء اللي ما حبيته الفرشاة اللي بتجي معه سيئة و صغيرة و بحس ما الها داعي + مش مناسب للسهرات و الحفلات الكبيرة لانه ما بيدوم لفترة طويلة
درجته : Soft Plume اللون بينك على موف بس بيطلع بينك اكثر شيء
تقييمي له : 7.5/10
- و اخيرا عندنا Pure Color Gloss Stick من Estée Lauder هو جلوص على شكل ستيك بس انا بحسه روج و بنفس الوقت جلوص يعني يعطيكي لون غني و قوي تبع الروج و بنفس الوقت يعطيكي امتلاء الجلوص .. من اروع الاشياء صراحة اللي جربتها بحياتي
بيرطب و بينعم الشفايف + لون ولا اروع و واضح جدا + ثابت و يدوم لمدة طويلة + الريحة حلوة و حتى شكله كيوت و تغليفه انيق
ييجي منه كتير الوان طبعا بس انا جبت منه لون واحد فقط لاخذ فكرة عنه
درجته : 15 Cherry Ice - و هو عبارة عن خليط بين الكورال و الاحمر الكرزي
هل رح ارجع اشتريه ؟ : بدون ادنى شك ان شاء الله و بنصحكم فيه و بشدة
- اللي جربت منتج من هالمنتجات تحكيلي عن تجربتها
شكرا على متابعتكم و تشجيعكم الي و يا رب اكون عم فيدكم و لو شوي
دمتن في رعاية الله (:
No comments:
Post a Comment