ملاحظة : عندي كتير حكي مهم عنه حاولي ما تتجاهليه لانه بيهمك
- كلوران شركة طبية فرنسية غنية عن التعريف اكيد و الها شعبية كبيرة باوربا و هالشركة الي قصة حلوة معها بحيث اني كنت بستعمل شامبوهاتهم ايام كان عمري 7 - 10 و 12 و امي طبعا ساعتها اللي كانت تختار اي شيء يتعلق بي فانا مرة قلتلها ما عاد بدي مو حلو و من الصيدلية كاني مريضة خخخ و انا خلاص كبرت "قال يعني" قالتلي ليش شو بدك انتي ما في احلى من كلوران قلتلها بدي بانتين او سانسيلك "طبعا ساعتها عرفت هالاسمين من الاعلانات و البنات الحلوة و الشعر الطويل" و انا بنت صغيرة ما بفهم بهالقصص فكنت كتير منبهرة بهيك اعلانات و ضليت جرب و جرب و جرب و عدت سنييين و رجعت هلا لحبيبي كلوران و رجعت لكلام امي حبيبتي
شامبو مناسب لكل الناس عموما و لصاحبات الشعر العادي على دهني خصوصا و مكتوب كمان انه ينفع لكل الافراد
مناسب للاستعمالات المتكررة او اليومية لانه في عندهم مجموعة من الشامبوهات مش للاستعمال المتكرر يعني مرة بالاسبوع مثلا فقط مثل كانه دواء بيعالجلك شغلة بشعرك او بيضيف شغلة لشعرك في منه حجمين الصغير 200ml و الكبير 400ml اللي عندي صغير لاني حبيت اخذ فكرة هل رح يناسبني يا اما لا
اللي حبيت فيه نشفلي شوي شعري من الجذور لا تستغربوا من شغلة حبيته لانه نشفلي شعري و هذا لانه لا يحتوي على مادة السيليكون "اللي بتهيالك انه شعرك املس و ناعم و هي بالحقيقة بتكون عم تضرك" و كمان لانه طبيعة شعري الحقيقية دهني شوي من الجذور و عادي من النص و الاطراف فكنت بحاجة لشامبو ينشفلي الجذور
مستخلص من "حليب الشوفان" - الرائحة طبيعية جدا يعني ممكن تعجب الناس اللي بتحب الطبيعة و النباتات انما الناس اللي بتحب الروائح الانثوية ذات التركيبات المتنوعة "فواكه و ازهار الخ ..." اللي موجودة بشامبوهات بعض الماركات اللي من الدرجستور و الهاي اند ما حيحبوها على ما اعتقد
مشكلته الوحيدة ما بيرغي كتير الا اذا حطيتي كمية زيادة يعني مثلا انا معي قرب يخلص مع اني استخدمته 4 مرات فقط يعني ما لحق المفروض بس لاقدر حطه على كامل الشعر خصوصا انه شعري طويل و ليرغي بضطر حط كمية اكبر "شوي" بس لحظة !!!!
هاي لا تعد مشكلة ابدا بالعكس هذا ان دل على شيء فهو يدل على صحة و جودة الشامبو يعني ما بينخاف منه ابدا لانه نسبة مادة السولفيت اللي بتخلي الشامبو يرغي كتير قليلة نوعا ما "موجودة" انما قليلة فاذا كان فهمك انه الشامبو كل ما زادت رغوته بيكون عم ينظفلك شعرك رح قلك هذا اعتقاد خاطئ لانه كل ما قلت الرغوة بتقل نسبة الكيماويات الضارة اللي بتخلي الشعر يفقد نضارته
تقييمي له : 4/5
مضبوط مش احلى شامبو جربته و لكنه اكثر شيء جربته صحي يعني حاسة بنوع من الراحة و الطمانينة على شعري بحيث انه بيتغذى بالشكل الصحيح - خالي من السيليكون و البارابين - نسبة السولفيت قليلة بالاضافة انه ناسبني
هل رح ارجع اشتريه : ان شاء الله بعد ما يعدي كام شهر - ليش ؟
لانه الشامبو لازم يتغير من وقت للثاني و الا شعرك حينضر و يتساقط و يتقصف لانه مفعول الشامبو السابق بيكون قل
نصائح :
- تجنبي الشامبوهات اللي تحتوي على السيليكون و البارابين بالنسبة لمادة السولفيت فهاي حتلاقيها موجودة بجميع الشامبوهات بس حاولي تختاري الشامبو اللي بيحتوي على اقل نسبة منها
- لنتيجة افضل استعملي الملين و حمام زيت و الماسكات و الزيوت الطبيعية مرة بالاسبوع و اختاريها طبعا حسب طبيعة شعرك يعني الشامبو لحاله لا يكفي لانه منظف و احيانا بيكون معالج بس الملين هو اللي بيحمي شعرك و الماسكات و الزيوت بتغذيه
ملحوظة :
- هالبوست موجه للناس اللي شعرها دهني او عادي لانه بينشف الشعر يعني اذا كان شعرك جاف فلا تفكري تجيبيه
- ممكن افراد العائلة كلها تستعمله لانه مكتوب انه مناسب للجميع
- مش شرط اللي يناسبني يناسبك انا بحكي و بحكم و بقيم المنتجات حسب تجربتي الخاصة
ان شاء الله تكونوا استفدتوا شوي و شكرا على المتابعة
No comments:
Post a Comment