February Best & Worst.

 

بونسوار صبايا كيف الحال؟

اليوم رح اشارككم الاشياء البسيطة اللي استعملتها خلال شهر فبراير و شو حبيت و ما حبيت من هالمنتجات مثل ما عم بتشوفوا الاشياء اللي استعملتها هذا الشهر مكياج - طلاء اظافر و مستحضري العناية بالبشرة 

في اشياء اشتريتها و اشياء اخرى هدايا من شركة اوريفليم " ماسكارا - قلم محدد العيون - كحل " 

رح نبدا ان شاء الله مع هالمنتجين من ايف روشيه كريم مرطب و مهدئ للبشرة كوني بحب المنتجات الطبيعية يمكن اكثر من المنتجات الطبية ليش لانه المنتجات الطبية مضبوط معمولة لجميع انواع البشرة و لكنها معمولة اكثر شيء للناس اللي بشرتها حساسة او اللي عندها كتير مشاكل لتعالجها و تحميها بمعني انها مكونة من مواد طبية فقط - ما في رائحة - ما في لون - باختصار لا تضيف شيئا للبشرة اللي ما فيها مشاكل سوى انها بتؤدي دورها بدون زيادة او نقصان و بتحميها طبعا

 بينما المنتجات الطبيعية مكوناتها عبارة عن خضر - فواكه - نباتات و اعشاب يعني مواد مغذية و فيتامينات اللي بتحتاجها اي بشرة يعني منتجات بتؤدي شغلها بالترطيب و التنظيف الى اخره بنفس الوقت تغذي و تنعش و تريح البشرة فبالتالي يعتبر هالشيئ اضافة لبشرتك 

 طبعا هذا الحكي موجه للناس اللي بشرتها خالية من المشاكل انما اللي بشرتها حساسة و تعاني من مشاكل تعالجها و تحميها باستعمال المنتجات الطبية احسن و اضمن و بس تعالجيها فيكي تجربي المنتجات الطبيعية 

  ايف روشيه من الشركات الطبيعية اللي بحبها لانه شغلها كله نباتات و اعشاب و خضراوات فقررت اخذ شغلتين من مجموعة Hydra Végétal و اللي هي مخصصة للبشرة العادية الى المختلطة باستثناء المهدئ اللي بالصورة على اليمين مناسب لجميع انواع البشرة و الكريم اللي على اليسار للبشرة العادية الى جافة

و في بالمجموعة Anti rides و Anti Puffiness كمان مخصصة لجميع انواع البشرة اما باقي المجموعة كلها مخصصة للناس اللي بشرتها من عادية الى مختلطة انا بشرتي عادية الى جافة هذه الفترة لهالسبب اخذت هالمهدئ و الكريم المرطب 

 

- Moisture Boost Concentrate : مهدئ لجميع انواع البشرة الكل بيمدحه و الكل قال انه احلى شيء بالمجموعة و فعلا طلع رائع و جميل جدا بييجي على شكل جل برائحة الخيار رائعة و منعشة شكله مثل السيروم مثل ما عم تشوفوا بالصورة و يستعمل كمان مثل السيروم نقطتين صغار فقط و بعدين يدلك بطريقة ناعمة على الوجه

هالعملية لازم تتم بالليل على بشرة نظيفة لانه بهالوقت بالضبط البشرة تحتاج الى راحة و تهدئة 

 

 تقييمي له : 5/5

 

 

 - 24H Rich Hydrating Cream : كريم مرطب للبشرة العادية الى جافة بنفس التركيبة و نفس الرائحة الاكثر من رائعة "رائحة الخيار" احساس ولا اروع حبيت نومتي كتير من اول ما بدات احطه كون رائحته جدا مريحة و ترطيبه عميق و بيدوم لمدة طويلة فعلا لاني بحطه بالليل على بشرة نظيفة بعد المهدئ و لما بصحى بحس حالي مثل كاني لسه حاطته

 من ناحية الملمس فهو ثقيل كتير لهذا السبب بحطه بالليل مع انه ممكن ينحط بالنهار و لكن بما انه ثقيل اختارت اني احطه بس بالليل  

 

 تقييمي له : 4/5

 

 

 

- Oriflame Bronzing Pearls :  كويرات لؤلؤية تحتوي على لونين البينك و البرونز جميلة جدا و احلى شي لما بندمجهم سوا بيعطونا لون ولا اروع

حبيت شكل المنتج كتير شيك و انيق - حبيت اللون - لكن ثباته مو هالقد للاسف يعني ساعتين بالكتير

 

تقييمي لها : 3.5/5 

 

- Labello Fruity Shine Strawberry : مرطب الشفايف من حبيب الملايين Labello بنكهة الفريز 

 حبيت اكثر شيء اللون الاحمر الطبيعي شي روعة صراحة لدرجة انه صار من اساسيات صباحي يعني ما فيي انزل بلا ما احطه على شفافي بيخليها مثل الكرز يعني حمراء بشكل طبيعي و معقول و هو مكمل لمكياجي الصباحي لانه قبل ما بحطه بس اطلع عالمراية بحس انه في شيء ناقص و انه لوني شاحب و  شفايفي كانها ذبلانة و بحاجة لشيء معين يصحيها خخخ

 تخيلوا كيف شيء صغير و بسيط يغير طلتك باكملها لكن ..

 من حيث الترطيب مو شيء Super صراحة لازمني كل ربع ساعة احط منه و طبعا الواحد مو دايما بيكون فاضي لدرجة كل ربع ساعة يطلع المرطب و يحطه مع اني بعملها الصراحة خخخ "مجبورة و الله" كله عشان اللون خخخ

 

تقييمي له : 3/5

 

 

 

- Jordana Single Eyeshadow : اول شيء اشتريه من هالماركة و للاسف خيبلي ظني هالشادو اسوء شادو استعملته بامانة

 لما شفت بياضه حبيته كتير و تحمست لتجربته و بس جربته طلع بده شي 20 طبقة ليعطيني اللون الابيض و انا من اشد المعجبين بالشادو الابيض "لعدة اسباب رح اذكرها لكم بغير بوست"  

تقييمي له : 0/5

درجته : 104 White Wedding

 

- Maybelline Super Stay 24H Concealer : هالكونسيلر حيرني لانه حلو لاعلى المراتب و بشع بطريقة تعصب خخخ

 يعني من ناحية التغطية ثقيلة و روعة و فعلا ما توقعت انه هالكونسيلر رح يعجبني كتير هالقد لانه مثل ما بتعرفوا عندي انتفاخ وراثي فابدا مش هين لاقي شي يغطيلي هالشغلة او يخففلي منها لانه الموضوع مو شوية تعب او ارهاق و بيروحوا مع الراحة و النوم الكافي الخ ... 

بل شيء موجود و ما فيه يروح هيك بطرق بسيطة و الوحيد اللي كان يغطيلي هالشغلة هو مصحح بوبي براون و لكن للاسف ما قدرت لاقيه هالمرة بدي استنى كم شهر ليرجعوا يجيبوه فاخذت Super Stay و فعلا طلع روعة بدون مبالغة

مشكلتي الوحيدة معه "اللون" اغمق من لون بشرتي بدرجتين و لكن لما بمزجه مع كونسيلر اخر افتح منه بيعطيني شكل مقبول نوعا ما

من الاشياء الاخرى اللي ما حبيتها بيطلع خطوط تحت العيون لكن اذا رطبتي اولا منطقة العين - و حطيتيه بطريقة الطبطبة باصبعك و ثبتيه بالبودرة بتبطل هالخطوط تظهر 

 تقييمي له : 4

درجته : 2 Light

 

 

- 2FX Mascara From Oriflame : ماسكارا هدية من اوريفليم جدا سيئة صراحة ما عم اقدر لاقي شيء حلو فيها

 مكتوب بموقع اوريفليم انها تحتوي على فرشتين واحدة بتكثف الرموش و الثانية بتعطيها سواد و للاسف ما شفت تكثيف ولا سواد او يمكن الاجانب بالنسبه لهم هذا اسمه سواد خخخ

تقييمي لها : 0/5 

 

- Kohl Pencil  :  الكحل كمان سيء جدا صراحة

بيحرق العين - مو ثابت - سواده خفيف - مو بيجمنتد للاسف

بالصورة على اليسار "الخط العريض"

 

تقييمي له : 0/5 

- Smooth Definer :  محدد العين ييجي على شكل ستيلو سواده ثابت جدا و مريح على العين و هو عكس الاول تماما  

 

تقييمي له : 3.5/5 

و الاثنين درجتهم : Black 

- Kiko Nail Polish : هالماركة انا بشوفها كتير حلوة و كتير مظلومة مع اني رحت مرة و جربت كذا شغلة من عندهم حبيتها كتير كتير كتير و اسعارهم جميلة و مناسبة للجميع و الكواليتي Super Super Super

 و من ضمن الاشياء الرائعة اللي عندهم طلاء الاظافر كذا شكل و كذا نوع و زيليون لون

 بالنسبة لهذا اللون يعد من ال Pastel Colors و بما انه بتفصلنا اسابيع قليلة على فصل الربيع حبيت يكون هاللون كافتتاح للفصل الحلو ..

 اللون جميل جدا الكواليتي رائعة كمان + ثابت و ما بيتقشر الا بعد اليوم الرابع و هذا شيء حلو مقارنة مع الماركات الاخرى اللي تتقشر بسرعة

 

درجتها : 389 

 

تقييمي لها : طبعا 5/5 

 

 

- Rimmel Kate Moss Lasting Finish Matte Lipstick : الروج العبقري هيك بحكي عنه انا خخ رائع كلمة قليلة عليه صراحة وضوح اللون - مطفي 100% - ثابت - شكل كيوت - ما بيقشر الشفاه لكن لازم تحطي قبله مرطب لانه مهما كان الروج مات لازم "ترطيب" 

 يعني فعلا عبقري بما انه من Drugstore و فيه كل هالمميزات و بسعر بسيط جدا و مناسب 

بنصح فيه و بشدة خصوصا للبنات اللي بتحب المات 

  

 

تقييمي له : 5/5 

 

درجته : 111 "Kiss of life"  

 

وهيك بكون خلصت ان شاء الله تكونوا حبيتوا البوست و ان شاء الله اكون افدتكم و اللي عندها اي سؤال تتفضل طبعا باي وقت 

و اسفة على الكواليتي السيئة تبعيت الصور للاسف استعمل كاميرا عادية ان شاء الله بالايام القادمة تكون اوضح 

 

دمتن في رعاية الله :)