Weekly Best & Worst #2

بونسوار صبايا كيف الحال؟

اسبوع ثاني مع مفضلات جديدة و اشياء اخرى ما حبيتها مثل ما شرحتلكم بالاسبوع اللي فات 
كل اسبوع رح انزل مجموعة صغيرة مكونة من 4 الى 5 منتجات فقط رح احكي عنها بالتفصيل سواء حبيتها او ما حبيتها 
من ماركات و اقسام مختلفة بس هالاسبوع ما في كتير تنوع بالاقسام 
في 4 منتجات من قسم المكياج و منتج من قسم العناية بالبشرة

: Skin Care 









: Cetaphil Cleanser

غاسول منظف من سيتافيل للبشرات الحساسة و الجافة و مناسب للبشرة العادية كمان وظيفته مثل اسمه تماما بينظف البشرة و اللي عجبني فيه انه بذات الوقت مرطب و لطيف على البشرة 

بالنسبة لقوامه سائل خفيف جدا لونه ابيض و بدون رائحة يعني فيكي تنظفي بشرتك فيه و عيونك مفتوحة
 ما بيؤذي ابدا العيون و لا بيحرقها

ممكن تستعمليه بعد ما تشيلي مكياجك كتنظيف ما تبقى من الماسكارا و الاي لاينر الخ ...
 و ممكن تستخدميه لازالة مكياجك بس انا دايما بفضل استخدمه بعد ما اشيل مكياجي كونه غير كافي لازالة المكياج 

طريقته سهلة بتبللي وجهك و بتحطي شوي و بتدعكي بطريقة خفيفة كانك بتعملي مساج "ما بيطلع رغوة كتير على فكرة " و بعدين بتغسلي وجهك عادي 

برغم انه مكتوب انه مناسب للبشرة الجافة ما حسيت "ترطيبه" قعلا كافي لهالبشرة يعني شخصيا جربته من شهرين لما كانت بشرتي عادية حبيته كتير بس هلا صارت اقرب للجافة بما انه الخريف صار قريب و بشرتي دايما بهالفصل بتتغير و بتصير اقرب للجافة فما حسيته كافي يعني لما شطفت وجهي منه مضبوط حسيت بنعومة و نظافة غير شكل بس لما نشفت وجهي حسيت بشيء ناقص مع العلم انه منظف مش مرطب يعني هاي مو وظيفته الاساسية بس حسيت في شيء مش كافي سو رح اضطر اغيره لان وقته خلص و البشرات دايما بتتغير مع تغير الفصول 

اجمالا منظف حلو كتير - ما بيحرق العين - بيرطب البشرة بذات الوقت - لطيف على البشرة
اذا بشرتك عادية - حساسة او جافة و بتدوري على تنظيف حلو بنصحك فيه اذا مثلي بتدوري على شيء ينظف بشرتك و يرطبها بنفس الوقت لا بس ما بنكر اني حبيته و كتير و رح ارجع اشتريه اول ما تصير بشرتي عادية مثل ما كانت  

: Make-up 









 : Bourjois Délice De Poudre Bronzing Powder

برونزر من بورجوا في منه درجتين درجة 51 للبشرات الفاتحة / الحنطية
و رقم 52 للبشرات الغامقة 

شكله كيوووووت مثل ما شايفين بيشبه الشوكولا و هيدا اول شيء خلاني اشتريه اذا بدكم الصراحة خخخ  - ريحته اللي كتير ناس قالت انها ريحة شوكولا بالنسبة الي ما حسيت بهالشيء انه مضبوط ريحته رائعة يعني اول ما بتفتحي العلبة اللي بتشبه الكتاب بتشمي رائحة حلوة انما مش البيور شوكليت

اخذت رقم 51 بعد ما كنت كتير خايفة منه لانه في اراء كتيرة سمعتها و قريتها عن هالمنتج 
في ناس قالت انه اورنج و ناس قالت العكس فحبيت اجرب بنفسي و احكم 
سو مضبوط في نتفة اورنج باللون بس على البشرة ما بيطلع هذاك الاورنج المزعج بالعكس بيطلع معقول جدا بتحسيه برونزر على بلاشر انتي و عم بتوزعيه 

عن نفسي حبيته و ناسبني كتير و اعتقد كل من بشرتها بيضاء حيناسبها لانه في برونزرز معينة ما بتناسب اللي بشرتها بيضاء بحيث بيطلع شكلها كتير قاسي خصوصا اذا كان البرونزر داكن سو بيطلع تو هارش على لون البشرة يعني تخيلي بشرة بيضاء حواليها بقع بنية داكنة = ازعاج و انا من النوع اللي بحب الشغلة تطلع مرتبة و طبيعية يعني لو حاطة 30 شغلة بحب اخليها تطلع علي طبيعية كاني مش حاطة شيء 

البرونزر فيه شوية شيمر مو مطفي مليون بالمية بس هاللمعة مش واضحة على البشرة و طبعا هيدا شيء حلو كتير بالنسبة لي يعني  اضفي على بشرتي حيوية و اعطاني لمعة صحية حلوة بدون ما يبين الشيمر على الوجه 

بالنسبة لي مش مناسب للكونتور يعني مو مثل ما بعض البنات قالت ليش؟ لانه يحتوي على شيمر و ان كان قليل كمان النتفة الاورنج اللي حكينا عنها مش مناسبة للكونتور و تحدبد و اخفاء الملامح 
اجمالا من احسن البرونزرز اللي جربتها من الدرجستور و بنصح فيه كتير
















 :  Bobbi Brown Corrector In Porcelain Bisque

هيدا يعتبر حبيبي الحلو و هاي ثاني مرة برجع اشتري هالكوريكتر الرائع من بوبي براون في منه كتير درجات اللي عندي افتح و اول درجة بيخفي الهالات و الانتفاخ بطريقة واضحة و ملحوظة جدا جدا جدا حتى و ان كنت لا اعاني من اي شيء او الانتفاخ جد قليل و خفيف لازم احط منه بيغير منظر العين و بيحليها و بيخليها مصحصة يعني وصلت لدرجة اذا ما حطيت منه يوميا بحس بشيء مش تمام و ناقص باللوك "بستعمله كمان كبيز للاي شادو و بدمعة العين كمان" 

عيوبه انه ما بيناسب كتير اجواء الصيف و الحر بما انه كتير كريمي فبيسيح و بتصير البشرة بتبرق من كل النواحي و بيخبص كل شيء يعني بنصح فيه بالخريف و الشتاء 

شيء ثاني حلو فيه و مهم جدا و اللي هو ما بيخطط و ثابت جدا 
سو هالكوريكتر يعتبر من مفضلاتي الدائمة و اكيد اكيد بنصح فيه كتير 












: 208 Golden Rose Lip Pencil

محدد الشفايف من الماركة التركية جولدن روز صراحة و لا مرة جربت شيء من هالماركة مع انها متوفرة و بشدة عندنا بس دايما بشوفها قدامي انا و بتسوق بس ما بعيرها اي اهتمام بس من شهر كنت عم دور على لون معين بينك على موف و فيه نتفة نيود بس ما لقيته بولا اي ماركة باستثناء جولدن روز فاخذته و انا مو مقتنعة الا باللون خخخ تاري قلبي كان حاسس انه ما حيعجبني للاسف 
كتير ناشف و جاف و قاسي على الشفايف بيطلع حلو فحالة واحدة فقط اذا رطبتي شفافك و حطيتيه دغري 
بالنسبة للثبات يادوب ساعتين بدون ما تاكلي او تشربي 
اجمالا الشيء الوحيد الحلو فيه لونه غير هيك ما حبيت شيء للاسف 












 : Swatches 

: L'oréal Voluminous x5 Mascara in Extra Black  

من الماسكارات المفضلة عندي دايما بستعملها اذا حبيت كثافة و طول و رموش مقوسة
اذا رموشك طويلة صدقيني رح تحبيها كتير اذا قصيرة كمان رح تعجبك بس ساعتها رح تضطري تعيدي كام طبقة لتحصلي على كثافة و فوليوم حلو و طول معقول 
مناسبة للحفلات و السهرات يعني بايامي العادية ما بحب استخدمها لانها ما بتفرق الرموش ولا بتعطيها منظر صباحي طبيعي فاذا كنتي عم تدوري على رموش طبيعية متفرقة هالماسكارا مش مناسبة الك
 اذا بدك كثافة و طول و رموش مقوسة و ماسكارا ما بتلزق الرموش ببعضها بطريقة مقرفة و سوادها واضح جدا جدا جدا حتما بنصحك فيها    



















خلص البوست و ان شاء الله الاسبوع القادم رح نحكي عن منتجات اخرى جديدة جربتها 
بالفترة الاخيرة شو حبيت منها و شو ما حبيت و رح يصحبها ريفيو كالعادة مع السواتشز 
ان شاء الله اكون حكيت عن منتج حابين تجربوه و افدتكم و لو بالقليل 
شكرا على متابعتكم و تشجيعكم 















و دمتن في رعاية الله :)