Make-up For Beginners Part #2 | مكياج للمبتدئات

بونسوار صبايا كيف الحال ؟

 اسفة تاخرت بتنزيل الجزء الثاني للموضوع لاني حبيت اول شي الجزء الاول ياخذ حقه كما ان الدراسة بدات مثل ما بتعرفوا سو ما تواخذوني

بتمنى تكونوا حبيتوا الجزء الاول و استفدتوا منه 

هالجزء رح يتضمن كل ما يخص مكياج العين شو رح تحتاجي يا بايامك العادية يا بالسهرات و حتى اللي ما رح تحتاجيه كتير رح اكتب عنه لحتى اذا شي مرة حبيتوا تغيروا او اذا كان في عندكم تساؤل معين تلاقوا جوابه بهالبوست و كمان في بنات بتحب المكياج و بتحب تعرف انواعه و اشكاله فاعتقد اذا كنتي من هالبنات حتحبي الموضوع 

نبدا بسم الله :

طبعا مثل ما البشرة تحتاج لبرايمر ليثبت المكياج و ليتوزع بسهولة العين كمان تحتاج لنفس الشيء لتضمني انه الشادو يضل ثابت لساعات طويلة و اللون يبين اوضح و كمان لحتى ما يختفي اللون و يبهت بعد كم ساعة و كمان لحتى ما يسيح الشادو و تطلعلك خطوط 

"خصوصا للناس اللي جفنهم دهني"  

رح فرجيكم بعض صور البرايمرز الخاصة بالجفن من الدرجستور دائما 

طبعا ذكرت لكم السبب بالجزء الاول 

من اليمين بيز او قاعدة من ايسنس 

و من اليسار برايمر من الف 

طريقة توزيعه :

سهل جدا بتستعملي بس اصابعك و بتغطي الجفن كله فيه 

معلومة : 

فيكي تستخدمي بعد الشادوهات الكريمية اللي لونها قريب من لون جفنك كبيز بس هاي ميزتها ممكن تستعمليها مثل ما ذكرنا كبيز و كمان ممكن تستخدميها لحالها بدون ما تحطي بعدها الوان فمثلا اذا حسيتي انه لون جفنك غامق ممكن توحدي لونه بهالشادوهات الكريمية او اذا العيون تعبانة خصوصا بفترات الصباح ممكن تصحصي شكلك فيه 

صورة كمثال للالوان القريبة من لون الجفن و اعيد و اكرر لازم يكون الشادو كريمي مش اللي شكله بودرة 

في من هالالوان عند بورجوا و ميبيلين و ايسنس 

الاي شادو = ظل الجفون 

انواعه كتيرة في اللي بتيجي منفردة يعني لحالها و في اللي بييجوا داخل باليت يعني علبة تحتوي على عدة الوان و كتير درجات بتختاريها حسب الدرجات اللي بتحبيها او اللي بتناسبك في من ميبيلين و نيكس و الف و اللي بالصورة باليتس من كوستال سنتس ...

اول نوع المعروف جدا هو الشادو المضغوط اللي على شكل باودر اي بودرة في من ميبيلين و لوريال و نيكس
 و اللي بالصورة من ميلاني كتير روعة بنصح فيهم 

نوع اخر و اللي هو الشادو الكريمي في من بورجوا و ايسنس و اللي بالصورة من ميبيلين
طبعا فيكي تحطيه لحاله و في حالة ما اذا حبيتي تبدعي باللوك
 بتثبتيه بشادو بودرة بتختاري نفس اللون و بتدمجي معه كم لون من اختيارك اكيد 

النوع الثالث هو الشادو السائل و اللي بنصح فيه الناس اللي جفنهم جاف و ابدا ما انصح فيه البنات اللي جفنها دهني و بما ان الوان هالنوع ما بتكون كتير واضحة بنصحك تستخميها كبيز و ترجعي تحطي فوقه الشادو البودرة المضغوط بتختاري نفس اللون و نفس الدرجة لحتى يبين اللون بوضوح اكثر  
في عندنا من اليمين شادو سائل من ريميل 

و نوع اخر اسمه ستيك شادو بييجي على شكل قلم عريض في من كيكو و افون و اللي بالصورة من جهة اليسار اقلام او شادوهات
 نيكس و هي مناسبة للجميع

اخر نوع اسمه بيجمنت / لوز باودر عبارة عن شادو بودرته حرة في من نيكس و جوردانا ...
هالنوع حلو و لونه واضح كتير ما بيحتاج تحطي منه كتير لحتى يبين معك اللون 

هالانواع كلها اللي ذكرتها فوق منقسمة الى ثلاث اقسام :

المات = المطفية 
شيمر = شادو بلمعة خفيفة
سباركل = اللمعة الواضحة كتير كانك حاطة قطع الدايمند الصغيرة على جفونك و هالقسم موجود اكثر شيء بالشادو البيجمنت 




بمعني ممكن تجيبي من الشادو البودرة المضغوط نوع المات او الشيمر او السباركل اللميع 
و ممكن تجيبي من الشادو البيجمنت نوع السباركل او المات او الشيمر بعد و هكذا ... 





و الصورة توضح الاقسام الثلاث :

الماسكارا = Mascara



ما رح احكي عن الماسكارا كتير كلكم بتعرفوها و لو ان انواع فرشها تختلف عن بعضها في فرش بتطول و فرش بتكثف و فرش بتفرق الرموش و فرش مناسبة للناس اللي اصلا رموشها من متوسطة الطول الى طويلة و فرش بتناسب و بتطول اللي رموشها قصيرة هالموضوع طويل بده بوست لحاله و خاص فيه
 هلا رح اعطيكي بس مثالين واحدة مناسبة لفترات الصباح و الثانية للسهرات 

و طبعا ما تنسي اذا كانت عيونك بتدمع بسرعة اختاري دايما الماسكارات  ضد الماء كيف تعرفي انها ضد الماء 
رح تلاقي مكتوب عليها  يا waterproof او اختصار الكلمة WF



ماسكارات بورجوا و لوريال و ميبيلين و ماكس فاكتور عموما روعة بشهادة الجميع 
من اليمين ماسكارا من لوريال للتكثيف 
ماكس فاكتور لتفرقة الرموش اي مناسبة للمكياج الصباحي او اليومي 

في نوع اخر كمان ما كتير بينحكى عنه بس حلو و بتحسي بتغيير لما بتستعمليه و اللي هو الماسكارات الملونة 
طبعا مش مجبورة تستخدميها بس حبيت ادلك على كل شيء ممكن تحتاجيه و لكن انصح فيها اذا كنتي من محبي التغيير و مغامرة بطبعك حاولي تجربيها كنوع من التجديد 
و اللي بالصورة ماسكارا ملونة من كيكو و في منها بجميع الالوان 

Eyeliner = الاي لاينر 




في منه 3 انواع :


اللي من عاليمين نوع قلم سائل من ميبيلين في من ميلاني و سليك حلوين بعد 

اللي بالوسط اي لاينر كريمي او جل من ميبيلين كمان في من ايسنس حلو و في من لوريال و كاتريس 

و في لاينر ليكويد اي سائل و هذا النوع صعب شوي بحيث بيتطلب نوع من المهارة و الايد الثابتة اذا حركتيها هيك او هيك رح تخبصي كل شيء بس مع الوقت و الممارسة ما في شي بيضل صعب 
و اللي بالصورة من ريميل 

   

طبعا ممكن تستخدمي الشادوهات السوداء المطفية لتثبيتها اكثر و لحتى يبين طبيعي اكثر و احلى و حتى ان كانت عيونك بتتحسس 
من اي شيء داخل عيونك بتلجئي للحل الحلو و اللي هو كمان شادو اسود مطفي تستخدميه كاي لاينر 



و طبعا ما تنسي الاي لاينر ضد الماء للناس اللي عيونها بتدمع بسرعة نفس الشيء حتلاقي مكتوب  عليها 
يا waterproof او اختصار الكلمة WF



 كمعلومة مش جديدة بمعنى ممكن تعتبريها تذكير ممكن تستخدمي الشادوهات الكريمية كاي لاينر الغامقة منها او الملونة 
نفس النتيجة و نفس الروعة *-*




و اخر نوع و هو الاي لاينر الملون يعني بييجي منه عدة الوان للتغيير لحتى الواحد يطلع شوي من الاسود و البني و الغوامق عموما 
و اللي بالصورة من ميلاني و على اليسار نفس النوع بس بلمعة قوية اذا حبيتي تغيري اللوك و تعملي شيء مختلف

Eye pencil = قلم / كحل 






في منه نوعين :

نوع جاف و نوع  اخر تركيبته كريمي على سائل



النوع الجاف مناسب للبشرة اللي بتفرز دهون و العيون اللي بتدمع كتير و في عندنا بالصورة من لوريال الكحل القصير خخخ بس معلم كبير جدا حلو

و النوع الكريمي مناسب للجميع في من بورجوا ...
و اللي بالصورة من ميلاني 


و طبعا في منهم بالالوان مثل ما واضح بالصورة و الاختيار بيرجعلك بالاخير اكيد 

False Lashes = رموش اصطناعية 





طبعا ما فيه يكمل اللوك الا بالرموش الاصطناعية حتى لو رموشك طويلة و كثيفة صدقيني رح تحتاجي للرموش الاصطناعية كتير 
انا شخصيا بحب كتير من الدرجستور "ارديل - ريد تشيري - اندريا" بييجي منها ارقام عديدة و اشكال مختلفة 
في منها الطبيعية و الثانية الكثيفة و المقوسة ... 

 Brows = الحواجب 




مع انه سبق و حكيت عن هالموضوع بس رح اعيده ما في مشكلة 

ذكرت سابقا جل الحواجب اللي بييجي على شكل ماسكارا في منه نوعين :


نوع شفاف بلا لون و نوع ملون بتختاري اللون الاقرب للون شعرك لحتى يطلع طبيعي اكثر عليكي

وظيفته يرتبلك و يمشط لك حواجبك و ان كان ملون بيرتب الحواجب بنفس الوقت بيزودها بلون طبيعي جدا كانك مش حاطة شي 




من اليمين جل ملون من ميبيلين 

من اليسار جل شفاف من ايسنس 

رح تحتاجي كمان لبودرة الحواجب لحتى تملي فيها فراغات حواجبك و تلونيها بلون قريب او اغمق من لون شعرك بدرجة

من اليمين في عندنا كيت او علبة الحواجب من ذا بودي شوب 
و من اليسارمن الف

تذكير :

سبب وجود لونين بعلبة الحواجب و هو اللون الاغمق بتلوني فيه حواجبك و بتملي فراغاتها 
و اللون الافتح بتحطي منه ببداية الحاجب 

يعني ممنوع تغمقي حاجبك كله لازم بدايته تكون افتح و يغمق تدريجيا بنصه و اخره 










اخر شيء اقلام الحواجب تطبيقها شخصيا ما بحبه بيعطي شكل حاد بس اذا حبيتي تجربي حظك معه ممكن اكيد 
الشيء الحلو فيه اذا طبقتيه صح سريع جدا بترسمي فيه و بتلوني حواجبك فيه بلا ما بتضطري تجيبي فرشة و بعدين تاخذي بودرة الحواجب ...




من اليمين قلم من ميبيلين 
و من اليسار قلم من بورجوا

Brushes = الفرش 





اخر مقطع حيكون عن الفرش اللي رح تحتاجيها بمكياج عيونك و حواجبك 

اجمالا فرش الف و ريل تيكنيك و كوستال سنتس حلوين كتير و اسعارهم مناسبة جدا 
عيبهم مش موجودين اعتقد بالعالم العربي لازم تطلبيهم اون لاين بنفسك 
او تطلبي من تاجرة بتوثقي فيها تجيبلك طلبك 







اللي بالصورة مجموعة فرش من كوستال سنتس :




رقم 4 : لتوزيع الشادو على الجفن المتحرك


رقم 8 و 10 : لوضع الشادو على الرموش السفلية 


رقم 10 : للحواجب و للاي لاينر كمان 


رقم 12 : لتمشيط الحواجب و ترتيبها 


رقم 11 : لوضع الاينر الرفيع 

و اخيرا اهم فرشاة فرشة الدمج كمان من كوستال سنتس Coastal scents pro blending fluff



الدمج هو سر الشادو النظيف 
كل ما دمجتي اكثر بيكون مكياجك ارتب و انظف 

اذا حبيتوا الجزء الثاني و تحمستوا للجزء الاخير اللي رح نحكي فيه عن كل منتج بيخص الشفاه خبروني على تويتر او بالكومنتس

تابعوني على تويتر دايما و اسالوني قد ما بدكم بالاسك 

شكرا لتشجيعكم و متابعتكم الي دائما

و اذا في اي شيء مش مفهوم او مش واضح انا جاهزة استقبل كل الاسئلة و ارد عليها بكل فرح 

 دمتن في رعاية الله :)